Қирғизистонлик депутат Достон Бекешев амалдаги мактаб формасини танқид қилиб, уни қулайроқ, замонавийроқ кийимларга ўзгартиришни таклиф қилди. Бу ҳақда у бугун 25 февраль куни Жогорку Кенеш йиғилишида айтиб ўтди.
Бекешевнинг айтишича, дресс-код тушунчасини тарихий контекст нуқтаи назаридан қайта кўриб чиқиш зарур.
“Ўрта асрларда кийим турини черков белгилаган. Англияда таълим ривожланиши билан камбағаллар учун мактаб формаси жорий этилган, сўнгра элит таълим муассасалари ўз услубини яратишни бошлаган. Шу тариқа, бу ҳодиса бутун дунёга тарқалган. Аммо барча мамлакатларда биздагидек қатъий костюм кийиш мажбурий эмас. Агар сиз костюм киймасангиз, галстук тақмасангиз, ўқитувчи танбеҳ беради. Ўш, Иссиқкўл ва Боткенда ўқувчилардан келган кўплаб мурожаатлар форманинг баъзан ноқулай эканини кўрсатмоқда”, деган у.
Депутат, шунингдек, мактаб формасига бўлган бундай талаблар совет даврининг мероси эканлигини қўшимча қилган.
“Хитойда ўқувчилар спорт кийимида юришлари мумкин ва тадқиқотлар шуни кўрсатадики, бу соғлиқ учун фойдали. Мен ҳамма спорт кийимга ўтиши керак деб айтаётганим йўқ, аммо камида “smart casual” (расмий ва кундалик услубнинг уйғунлиги) услуби мақбул бўлади. Нега ўғил болалар футболка ва жинси шим кийиб келолмайди, қизлар эса доимо юбка кийиши шарт?” деб норозилигини билдирган депутат.
У ҳукуматни талабларни юмшатишга ва мактабларга ўз формаларини танлаш имконини берувчи қоидаларни ишлаб чиқишга чақирган.
“Мен депутатлардан бошлашни таклиф қилардим. Халқаро протоколлар расмий дресс-кодни талаб қилиши мумкинлигини тушунаман, аммо ҳамма парламентларда костюм ва галстук кийилмайди. Бу кўпинча ноқулай бўлади. Эски талабларни қайта кўриб чиқиш зарур. Нега назоратчи келганларнинг кийимини, ким кийган, ким киймаганини текшириши керак? Бу нормаларни қайта кўриб чиқиш лозим!” дея нутқини якунлаган Бекешев.
