Туркия ўзининг шарқий томондаги қўшниси Эрон ҳамда АҚШ ўртасида қуролли можаро келиб чиқиши эҳтимолига қарши кўрилиши лозим бўлган барча чоралар ва уларнинг жиҳатларини атрофлича ўрганмоқда. Бу ҳақда 25 февраль куни Reuters агентлигига туркиялик дипломатик манба маълум қилди.
Минтақадаги вазият ва дипломатия
Вашингтон Яқин Шарқдаги ҳарбий салоҳиятини ошираётган ва эҳтимолий урушга тайёрланаётган бир вақтда, февраль ойи бошида Эрон ва АҚШ ўртасидаги ядровий музокаралар қайта тикланди.
Теҳронга ҳужум қилинган тақдирда, Эрон минтақадаги АҚШ ҳарбий базаларига зарба бериш билан таҳдид қилган. Бироқ 24 февраль куни Эрон ташқи ишлар вазири агар дипломатияга устуворлик берилса, Вашингтон билан келишувга эришиш “имкон даражасида” эканини таъкидлади.
Анқара позицияси
НАТО аъзоси бўлган Туркия Эронга нисбатан ҳар қандай ҳарбий аралашувга қарши эканини ва минтақада беқарорлик юзага келишини истамаслигини бир неча бор маълум қилган. Анқара кескинликни пасайтириш мақсадида ҳар икки томон билан алоқада бўлиб, масалаларни дипломатик йўл билан ҳал қилишга чақирмоқда.
“Табиийки, вазият салбий томонга ўзгарган тақдирда кўрилиши мумкин бўлган чораларнинг барча жиҳатлари баҳоланмоқда. Барча сценарийлар кўриб чиқилмоқда, фуқароларимиз хавфсизлигини таъминлаш учун ташланадиган қадамлар устида иш олиб бориляпти”, деди аноним манба.
Шунингдек, манба Туркия томонидан амалга ошириладиган ҳар қандай чора Эрон суверенитетини бузмаслигини ва бу масала муҳокама қилинмаслигини алоҳида қайд этди. Ҳозирча Туркия айнан қандай чоралар устида ишлаётгани бўйича аниқ тафсилотлар очиқланмаяпти.
Дезинформацияга раддия
Аввалроқ Туркия президенти администрацияси ҳузуридаги Дезинформацияга қарши кураш маркази ОАВда тарқалган хабарларни рад этган эди. Унда Туркия қочқинлар оқимини тўхтатиш учун Эрон ҳудудига киришни режалаштираётгани ҳақидаги маълумотлар ҳақиқатга тўғри келмаслиги билдирилган.
