Фарғонада катта миқдорда ноқонуний дори воситалари аниқланди. Бу ҳақда Давлат хавфсизлик хизмати хабар қилди.
Қайд этилишича, вилоятнинг Ўзбекистон туманида яшовчи, 1990-й.т. фуқаро С.Ғ. тадбиркор сифатида давлат рўйхатидан ўтмасдан, ўзига қарашли бўлган нотурар бинода, тегишли ҳужжатларсиз дорилар чакана савдоси билан шуғулланаётгани фош бўлган.
Тегишли органлар иштирокида ўтказилган тезкор тадбирда ушбу манзилда номувофиқ шароитда сақланаётган жами 66 турдаги 41 319 дона дори воситалари борлиги, шундан 56 турдаги 36 361 та маҳсулотда мувофиқлик сертификатлари йўқлиги маълум бўлган.
Таъкидланишича, дориларнинг умумий қиймати 1 миллиард 565 миллион сўм бўлган.
Ҳозирда мазкур шахсга нисбатан Жиноят кодексининг тегишли моддаси билан иш очилиб, тергов ҳаракатлари олиб борилмоқда.
