Фламанд рассоми Петер Паул Рубенсга тегишли 400 йил давомида йўқолган деб ҳисобланган расм аукционда қарийб 3 миллион еврога сотилди. Бу ҳақда “Le Parisien” хабар берди.
Нашрнинг ёзишича, Петер Паул Рубенснинг 1613 йилда чизилган “Хочга михланган Исо” номли картинаси қарийб 3 миллион еврога сотилган. Сурат ҳажми 105,5 × 72,5 см бўлиб, у 2024 йил сентябрь ойида Парижда топилган. Osenat аукцион уйи президенти Жан-Пьер Осенанинг маълум қилишича, расм яратилганидан кўп ўтмай ғойиб бўлган ва узоқ вақт давомида йўқолган асар сифатида қаралган.
Osenat аукцион уйи савдолари кеча, 30 ноябрь куни Версалда ўтказилган. Лотнинг бошланғич нархи 500 минг евро бўлган. Натижада расм комиссия билан бирга 2,9 миллион еврога сотилган. “Le Parisien”нинг ёзишича, бу нарх унчалик ажабланарли эмас, чунки рассомнинг асарлари одатда бир неча миллион еврога баҳоланади.
“Хочга михланган Исо” картинаси 4 аср давомида йўқолган ҳисобланган. Унинг қандай қилиб Францияга бориб қолгани номаълум. Маълум бўлган ягона факт – XIX асрда уни рассом Вильям Бугро сотиб олгани. Картина Парижнинг олтинчи округидаги хусусий уйда сақланган. Уни уйни сотишга қарор қилган меросхўрлар топган.
Асарнинг ҳақиқийлиги техник экспертизалар, рентген текширувлари ва пигментларни таҳлил қилиш орқали тасдиқланган. Экспертизани ХV-XVI асрлар санъати бўйича мутахассис, Антверпен шаҳридаги Rubenianum тадқиқот ташкилоти президенти, профессор Нильс Бюттнер бошчилигидаги мутахассислар гуруҳи ўтказган. У ташкилот Рубенснинг собиқ устахонаси яқинида жойлашган.
