Норвегия терма жамоаси ҳамда “Манчестер Сити” ҳужумчиси Эрлинг Ҳоланд фаолиятини Франция чемпионатида давом эттириши мумкин. Fichajes нашри хабарига кўра, футболчига Парижнинг “ПСЖ” клуби жиддий қизиқиш билдирмоқда.
Унга кўра, французлар нервегиялик форвард учун 200 миллион евро тўлашга тайёр эканлигини билдирган. 2026-йилнинг ёзида “ПСЖ”нинг икки нафар ҳужумкор футболчиси — Ли Кан Ин ҳамда Гонсалу Рамуш кетиши кутилмоқда. Шундан кейин парижликлар ҳужум чизиғини кучайтиришни мақсад қилган. Ҳоланд эса ушбу позиция учун идеал номзод ҳисобланади.
“Манчестер Сити” ҳозирча ҳужумчини қўйиб юбориш ҳақида ўйламаяпти. Жамоа бош мураббийи Хосеп Гвардиола учун Ҳоланд “тегиб бўлмас футболчи” ҳисобланади. Аммо ҳужумчи ва “Сити” ўртасидаги шартномага 2024-йилдан бошлаб 200 миллион евролик товон пули банди киритилган. Бу банд орқали Англия Премьер Лигаси ташқарисидаги клублар ҳужумчини сотиб олиш имконига эга бўлади. Шу билан бирга, Ҳоланд қанча узоқ “Сити” сафида қолса, товон суммаси камайиб боради. “ПСЖ” эса ушбу бандни фаоллаштириш орқали футболчини сотиб олишни мўлжалламоқда.
Аввалроқ Эрлинг Ҳоландга “Реал Мадрид” ҳамда “Барселона” каби клублар ҳам қизиқиш билдираётгани ҳақида хабарлар тарқалганди.
