Покистон хавфсизлик кучлари Афғонистон чегараси яқинида 15 нафар жангарини йўқ қилди. Бу ҳақда Associated Press хабар берди.
Рейдлар разведка маълумотлари асосида ўтказилган бўлиб, хавфсизлик кучлари жангариларнинг иккита бошпанасига бостириб кирган. Дастлаб Хайбер-Пахтунхва вилоятининг Дера Исмоилхон туманида ўтказилган амалиётда 10 нафар покистонлик “Толибон” аъзоси йўқ қилинган. Шимолий Вазиристон туманидаги иккинчи рейдда эса яна беш жангари ўлдирилган.
Ҳарбийлар ўлдирилган жангариларни “хавориж” деб атаган. Расмийлар ушбу атамани тақиқланган “Таҳрики Толибон Покистон” (ТТП) билан боғлиқ гуруҳларга нисбатан қўллайди. 2021 йилда Афғонистон “Толибон” ҳокимиятга қайтгач, ТТП янада фаоллашган бўлиб, кўплаб ҳужумлар учун жавобгарликни ўз зиммасига олган ва минглаб инсонлар ҳаётига зомин бўлган.
Покистон ҳукумати 2022 йилда ТТП билан қисқа муддатли сулҳга эришган эди. Бироқ жангарилар келишувни бузиб, Исломобод ўз мажбуриятларини бажармаганини даъво қилди. Шундан сўнг Покистон ТТП билан музокара қилинмаслигини таъкидлади ва Кобулдан гуруҳ етакчиларини топширишни талаб қилди. Мутахассислар фикрича, ТТП билан кураш давом этар экан, Покистон ва Афғонистон ўртасидаги муносабатлар яна кескинлашиши мумкин.
