АҚШ ҳарбийлари мамлакат Президенти Дональд Трампга қарши суиқасд режасига алоқадор деб ҳисобланган эронлик амалдорни йўқ қилганини маълум қилди. Пентагонда ўтказилган брифингда Пит Ҳегсет мазкур шахс Эрон томонида Трампни ўлдириш режаси билан боғлиқ бўлган махсус бўлинмани бошқарганини иддао қилган. Бу ҳақда “Reuters” хабар берди.
Ҳегсет маълум қилишича, операция кеча, 3 март куни амалга оширилган. У бу нишон урушнинг асосий мақсади бўлмаганини, аммо Трампга қарши режа тузганлар кейинчалик нишонлар рўйхатига киритилганини таъкидлаган.
“Эрон Трампни ўлдиришга уринган, аммо охир-оқибат Трамп устун келди”, деган вазир журналистларга.
2024 йилда АҚШ Адлия вазирлиги Эрон Ислом инқилоби қўриқчилари корпуси буюртмаси билан Трампга суиқасд уюштириш режасига алоқадор деб гумон қилинган эронлик шахсга қарши айблов эълон қилган эди. Теҳрон эса бу айбловларни рад этиб келган.
Пентагон брифингида Вашингтон армияси Эронга қарши амалиётларда муайян устунликка эришаётгани ҳам урғуланган. Қўшма штаблар бошлиғи генерал Дэн Кейннинг сўзларига кўра, Теҳрон томонидан учирилаётган баллистик ракеталар сони урушнинг биринчи кунига нисбатан 86 фоизга камайган, бир томонлама ҳужум дронлари эса 73 фоизга қисқарган.
Қўшма Штатлар зарбалари айни пайтда Эрон жанубий соҳиллари бўйлаб кенгаймоқда. Пентагон маълумотига кўра, Вашингтон айрим ҳудудларда ҳаво устунлигини таъминлашга муваффақ бўлган.
