Бухорода 2 та таълим ташкилотига асоссиз ҳисобланган қарздорлик ортидан “Ҳудудий электр тармоқлари” АЖнинг “Энергиясавдо” филиалига нисбатан иш қўзғатилди. Бу ҳақда Рақобат қўмитаси хабар қилди.
Қайд этилишича, Бухоро давлат университети ҳамда Бухоро давлат тиббиёт институтининг “Ҳудудий электр тармоқлари” АЖнинг тегишли филиали Бухоро бўлинмаси ҳаракатларидан норози бўлиб мурожаат қилган.
Ўрганишлар давомида ушбу ОТМларга оширилган тариф қўлланилиши эвазига 1,8 миллиард сўмдан ортиқ қўшимча тўлов ҳисоблангани маълум бўлди.
Ҳолат юзасидан “Ҳудудий электр тармоқлари”нинг тегишли филиалига нисбатан иш қўзғатилиб, нореал қарздорликни қайта ҳисоб-китоб қилиш ва қонунбузарликни бартараф этиш топширилган.
