Яқингача Россия НАТОга аъзо барча давлатларнинг жамига нисбатан кўпроқ ўқ-дори ишлаб чиқарар эди. Аммо сўнгги чора-тадбирлар туфайли бу тенденция ўзгарди. Бу ҳақда НАТО Бош котиби Марк Рютте Бухарестда бўлиб ўтган НАТО ва саноат форуми очилиш маросимида маълум қилди.
Унинг таъкидлашича, мазкур форум мудофаа саноати ва НАТО ўртасидаги ҳамкорлик соҳасидаги энг йирик тадбирлардан биридир. Рютте Гаагада июнь ойида бўлиб ўтган саммитда қабул қилинган мудофаа харажатларини ва ишлаб чиқариш ҳажмларини оширишга оид қарорлар амалда фаол жорий этилаётганини билдирди.
“Ҳозирда молиявий маблағлар кўпайди ва уларнинг оқими янада ўсади”, деди у.
Шу билан бирга, Рютте салоҳиятни янада ривожлантириш зарурлигини қайд этди:
More stories“Бизга замонавий жиҳозлар, ҳақиқий ўқ кучига эга қуроллар ва албатта, илғор технологиялар керак. Чунки биз дуч келаётган таҳдидлар ҳақиқий ва доимийдир. Россия томонидан Украинага қарши асоссиз бошланган уруш бу таҳдиднинг энг яққол намунаси. Аммо Россиядан келаётган хавф бу можаро тугагач ҳам йўқолмайди. У Европа ва бутун дунёда беқарорлик манбаи бўлиб қолади”, деди НАТО раҳбари.
Рюттенинг фикрича, Россия бу ҳаракатларида ёлғиз эмас:
“У Хитой, Шимолий Корея, Эрон ва бошқа давлатлар билан ҳамкорлик қилмоқда. Улар мудофаа саноати соҳасидаги ҳамкорликни мисли кўрилмаган даражага кўтаришмоқда ва узоқ муддатли тўқнашувга тайёрланмоқдалар”.
Унинг таъкидлашича, НАТОда ишлаб чиқариш ҳажмини ошириш ва етказиб бериш муддатларини қисқартириш бўйича жиддий бурилиш амалга ошмоқда:
“Яқингача Россия барча НАТО иттифоқчиларига нисбатан кўпроқ ўқ-дори ишлаб чиқарар эди, аммо энди бу бундай эмас. Бутун Альянс бўйлаб ўнлаб янги ишлаб чиқариш линиялари очилмоқда, мавжуд қувватлар кенгаймоқда. Биз охирги ўн йилликлардагига нисбатан анча кўпроқ иш қиляпмиз”, деди Рютте.
У форумда йиғилган мудофаа саноати вакилларига мурожаат қилиб, янги ғоялар яратишга ва НАТОни синов майдони сифатида фойдаланишга чақирди:
“Бу ерда йирик тажрибали компаниялардан тортиб, кичик инновацион стартапларгача бўлган ижодий онглар бор. Бизга сиз таклиф эта оладиган барча нарса керак, чунки эркин жамиятларда сизларнинг ижодкорлигингиз ривожланиши мумкин”, деди у.
Рютте, шунингдек, НАТОнинг Европа Иттифоқи, Украина, шунингдек Австралия, Япония, Янги Зеландия ва Жанубий Корея каби ҳамкорлар билан шериклигининг аҳамиятини таъкидлади:
“Биз бир-биримиздан кўп нарсани ўрганишимиз мумкин. Саъй-ҳаракатларни бирлаштирсак, ишлаб чиқаришни ошириш ва инновацияларни рағбатлантириш имкони туғилади. Бу барча тарафлар учун фойдали. Хавфли замонлар жасур қарорларни талаб қилади, бу эса муайян сиёсий ва иқтисодий таваккалчиликни англатади. Аммо ишонч билан айта оламан: мудофаага каттароқ сармоя киритиш учун сиёсий ирода мавжуд”, дея қўшимча қилди НАТО Бош котиби.
