Шимолий Корея етакчиси Ким Чен Ин Россияда хизмат вазифасини бажариб қайтган армия муҳандислик бўлинмасини тантанали кутиб олиш маросимини ўтказди. Бу ҳақда маҳаллий KCNA нашри 13 декабрь куни хабар берди.
Кутиб олиш маросими 12 декабрь куни пойтахт Пхеньян шаҳрида бўлиб ўтган ва унда юқори мартабали ҳарбий амалдорлар, ҳукмрон партия раҳбарлари, аскарларнинг оила аъзолари ва кўп сонли аҳоли иштирок этган.
Ким ўз нутқида Корея халқ армияси (КХА) 528-муҳандислик полкининг зобитлари ва аскарларини хорижий хизмат давомидаги 120 кунлик сафарда мамлакатнинг ҳукмрон Ишчилар партияси буйруқларини бажаришда кўрсатган хулқи ва қаҳрамонлиги учун мақтаган.
Шунингдек, у полкнинг жанговар шароитларда хавфли ҳудудларни тозалаганини ва партия ҳамда давлатга мутлақ садоқат кўрсатганини айтган. Бундан ташқари, КХДР раҳбари қўшинлар ўртасидаги сиёсий ғоявий тарбия, интизом ва бирликни юқори баҳолаб, уларнинг фаолиятини Қуролли кучлар учун намуна деб атаган.
Шимолий Корея томонидан эълон қилинган видеоларда ҳарбий кийимдаги аскарлар самолётдан тушаётгани, Ким Чен Ин ногиронлар аравачасида ўтирган аскарни қучоқлаётгани ҳамда аскарлар ва расмийлар бўлинмани кутиб олиш учун йиғилгани акс этган.
Маълумотларга кўра, бўлинма август ойи бошида жўнатилган ва Москва-Украина уруши пайтида Россиянинг Курск вилоятида жанговар ва муҳандислик вазифаларини бажарган. Россия Мудофаа вазирлиги ноябрь ойида ғарбий Курск вилоятига бостириб киришга уринган украиналикларга қарши курашишда қўшган ҳиссаси учун кореяликларга ташаккур изҳор этганди.
Жанубий Корея, Украина ва Ғарб манбаларига кўра, 2024-йилда икки давлат ўртасидаги ўзаро мудофаа пакти доирасида Шимолий Корея Курскда Россия томонида жанг қилиш учун 14 000 га яқин аскар юборган ва уларнинг 6 000 дан ортиғи ҳалок бўлган. Кимнинг айтишича эса, топшириқ давомида тўққиз нафар аскар ҳалок бўлган.
КХДР раҳбари уларнинг ўлимини “юракни эзувчи йўқотиш”, деб таърифлаган ва полк “Озодлик ва Мустақиллик ордени” билан тақдирланишини эълон қилган. KCNAнинг хабар беришича, ҳалок бўлган тўққиз нафар аскарга бошқа давлат мукофотлари қаторида “Корея Халқ Демократик Республикаси қаҳрамони” унвони берилган.
