Қорақалпоғистон Республикаси, Хоразм, Бухоро ва Сирдарё вилоятларида қарийб 7 миллиард сўмлик минерал ўғитни талон-торож қилганлар қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Қайд этилишича, департаментнинг Қорақалпоғистон Республикаси бошқармаси томонидан ўтказилган текширувда “E.V.” МЧЖ масъул шахслари “M.Ch.” АЖ билан тузилган шартномага асосан, сақловга қабул қилинган 4,3 миллиард сўмлик 1 473 тонна аммиакли селитра ва 790,6 миллион сўмлик 276 тонна аммоний сульфат минерал ўғитларини ўзлаштириш йўли билан талон-торож қилганликлари аниқланган.
Шу каби ҳолат Хоразм вилоятида ҳам фош этилган. Департаментнинг Хоразм вилоятидаги бошқармаси томонидан ўтказилган текширувда “A.B.” МЧЖ масъул шахслари “M.Ch.” АЖ билан тузилган шартномага асосан сақловга қабул қилинган умумий баҳоси 376,4 миллион сўмлик 126 тонна аммиакли селитра минерал ўғитларини ўзлаштириш ва растрата қилиш йўли билан талон-торож қилганликлари аниқланган.
Яна хабар қилинишича, Бухоро вилоятининг Ғиждувон туманидаги «B.T.» МЧЖ масъул шахслари ҳам “M.Ch.” АЖ билан тузилган шартномага асосан, сақловга қабул қилинган 760,1 миллион сўмлик 255 тонна аммиакли селитра ва умумий баҳоси 272,1 миллион сўмлик 95 тонна сульфат аммоний минерал ўғитларини ўзлаштириш ва растрата қилиш йўли билан талон-торож қилганликлари аниқланган.
Департаментнинг Сирдарё вилояти бошқармаси томонидан ўтказилган терговга қадар текширувда «Z.M.» МЧЖ масъул шахслари “M.Ch.” АЖ билан тузилган шартномага асосан, сақловга қабул қилинган умумий баҳоси 200,7 миллион сўмлик 67,4 тонна аммиакли селитра минерал ўғитларини ўзлаштириш ва растрата қилиш йўли билан талон-торож қилганликлари аниқланган.
Билдирилишича, мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.
