Жиззах ва Сирдарё вилоятларида икки ҳолатда жами 560 миллион сўмдан ортиқ маблағга тенг криптоактивлар билан боғлиқ ноқонуний ҳолатлар аниқланди. Бу ҳақда Ички ишлар вазирлиги хабар берди.
Қайд этилишича, Жиззах вилояти Шароф Рашидов туманида яшовчи олий таълим муассасаси талабаси криптоиловалар орқали қарийб бир йил давомида 200 миллион сўмдан ортиқ маблағни айрбошлаш операцияларида иштирок этгани аниқланган.
Иккинчи ҳолатда эса Сирдарё вилояти Мирзобод туманида яшовчи фуқаро қисқа вақт ичида 361 миллион сўмдан ортиқ криптоактивлар савдосини амалга оширгани маълум бўлган.
Билдирилишича, ҳар икки ҳолатда хам гумонланувчилар қўлга олиниб, уларга нисбатан Жиноят кодексининг 278-8-(криптоактивлар айланмаси соҳасидаги қонунчиликни бузиш) моддаси 3-қисми “а” бандига асосан жиноят ишлари қўзғатилган. Ҳозирда тергов ҳаракатлари олиб борилмоқда.
