Руминияда аёлларни ўлдиришга қарши курашишга қаратилган янги қонун кучга кирди. Унга кўра, бундай жиноят учун жазо энг оғир чорагача – умрбод қамоққача етиши мумкин. Бу ҳақда мамлакат Президенти Никусор Дан Facebook саҳифасида маълум қилди.
Давлат раҳбари аёлларга нисбатан зўравонликни “энг камситувчи ва ҳақоратли жиноятлардан бири” деб атаган. Унинг таъкидлашича, узоқ вақт давомида бу турдаги зўравонлик етарлича эътиборга олинмаган ёки самарали тўхтатилмаган, бу эса оғир оқибатларга олиб келган.
Президентга кўра, янги қонун мамлакатда аёллар ва болалар хавфсизлигини таъминлаш учун зарур механизмларни яратади, профилактика чораларини кучайтиради ҳамда ҳуқуқ-тартибот органларига тезкор аралашиш имконини беради. Шунингдек, бу ҳужжат адолат тизимини янада самарали ва инсонпарвар қилиш йўлидаги муҳим қадам сифатида баҳоланган.
Қонун лойиҳаси 2025 йил октябрь ойида парламентга киритилган, февралда Сенат, мартда эса Депутатлар палатаси томонидан қабул қилинган. 2026 йил 23 апрель куни президент томонидан имзоланган ушбу ҳужжат кенг қўллаб-қувватланган – уни 270 дан ортиқ депутат маъқуллаган.
Янги тартибга кўра, аёлларни ўлдириш учун 15 йилдан 25 йилгача озодликдан маҳрум қилиш ёки умрбод қамоқ жазоси белгиланади.
Қонунни кучайтириш зарурати мамлакатда оилавий жиноятлар сони ошгани билан изоҳланади. Масалан, 2025 йилнинг саккиз ойида 33 та қотиллик ҳолати қайд этилган бўлиб, уларнинг 69 фоизида қурбонлар аёллар ва қизлар бўлган. Ўртача ҳисобда, ҳар ой Руминияда уч нафар аёл ўз яқинлари томонидан ўлдирилади.
