Тошкент шаҳрида Халқаро автомобиль федерациясининг (FIA) йил якунларига бағишланган расмий тадбири бўлиб ўтди. Мазкур маросим Марказий Осиё минтақасида илк бор ташкил этилди. Бу ҳақда Миллий Олимпия Қўмитаси матбуот хизмати хабар берди.
“Сўнгги йилларда Ўзбекистон турли халқаро спорт тадбирларига мезбонлик қилиб келмоқда. FIA йил якуни маросимининг Тошкентда ўтказилиши ҳам мамлакатнинг бундай тадбирларни ташкил этиш борасидаги тажрибаси ва имкониятларини намоён этди”, дейилади МОҚ хабарида.
Унга кўра, тақдирлаш маросими доирасида етти йўналиш бўйича чемпионликни қўлга киритган автомобильларнинг асл намуналари Тошкентга олиб келинган. Тадбир давомида мавсум якунларига кўра юқори натижаларга эришган пойгачилар ва жамоалар тақдирланди.
Маросимнинг асосий воқеаси 2025-йилги “Формула-1” Жаҳон чемпиони совринининг Ландо Норрисга топширилиши бўлди. “Макларен” жамоаси пойгачиси мавсум якунланганидан бир неча кун ўтиб, Абу-Дабидаги сўнгги босқичдан кейин расман 35-жаҳон чемпиони сифатида тақдирланди.
Мавсум якунларига кўра иккинчи ўринни Макс Ферстаппен эгаллади. У соғлиғи сабаб маросимда шахсан иштирок эта олмади, бироқ видео мурожаат орқали Ландо Норрис ва “Макларен” жамоасини чемпионлик билан табриклади.
Шунингдек, тадбир давомида Конструкторлар кубоги ҳам “Макларен” жамоасига топширилди. Ушбу соврин жамоа томонидан кетма-кет иккинчи йил ҳамда клуб тарихида ўнинчи бор қўлга киритилди. Маросимда чемпионатнинг бошқа совриндорлари, жумладан Норриснинг жамоадоши Оскар Пиастри ҳам тақдирланди.
