Тошкентда маст ҳолда бегона аёлни қучоқлаб, унга нисбатан шилқимлик қилган эркак 5 суткага қамалди.
Аниқланишича, бу қилмишни 1968-йилда туғилган, Юнусобод туман мактабгача ва мактаб таълими бўлимида электрик вазифасида ишловчи B.М. содир этган. У 2025-йилнинг 9 ноябрь куни маст ҳолда “Кефаят” савдо маркази (Аҳмад Дониш кўчаси) олдидаги ерости пиёдалар йўлида А. исмли аёл ёнига келиб, бел қисмидан ушлаб, унга нисбатан шаҳвоний шилқимлик қилган.
Жабрланувчининг айтишича, у туннелдан дугоналари билан бирга ўтиб кетаётган пайтда B.М. яқинлашиб, ноқобил ҳаракатлар қилган ва унинг бел қисмидан ушлаб, шимини ечмоқчи бўлган.
Айбланувчи суд мажлисида ўша куни умуман алкоголь ичимлик истеъмол қилмаганини билдириб, айбини тан олмаган. Бироқ гувоҳлар ва ИИБ ходимлари кўрсатмалари орқали унинг айби исботланган.
Жиноят ишлари бўйича Юнусобод туман суди B.М.ни Маъмурий жавобгарлик тўғрисидаги кодекснинг 41¹-моддаси 1-қисми (шаҳвоний шилқимлик қилиш) бўйича айбли деб топилди. Унга нисбатан 5 сутка маъмурий қамоқ жазоси тайинланди. Ҳуқуқбузардан қамоқда сақлаш харажатлари маъмурий қамоқнинг ҳар бир суткаси учун БҲМнинг 15 фоиз миқдорида ундирилиши белгиланди.
