Space X ва Tesla асосчиси Илон Маск 600 миллиард долларлик бойликка эга бўлган тарихдаги биринчи одам бўлди. Бу ҳақда Forbes хабар берди.
У октябрь ойида ҳам бойлиги 500 миллиард долларга етган тарихдаги биринчи шахс бўлганди. Маск дунёдаги биринчи триллионерга айланиш учун яна бир улкан қадам ташлади, дейилади хабарда.
Декабрь ўрталарида у асос солган SpaceX компаниясининг қиймати 800 млрд долларга баҳоланди. Август ойида бу кўрсаткич 400 миллиард доллар эди.
Маск компания акцияларининг 42 фоизига эгалик қилади, унинг бойлиги 168 миллиард долларга ошиб, тахминан, 677 миллиард долларга етган.
SpaceX 2026-йилда биржага чиқишни режалаштирмоқда, шу сабаб компания қиймати олдиндан ҳисоблаб чиқилган. Мутахассислар бу жараён тарихдаги энг йирик IPO бўлиши мумкинлигини таъкидламоқда.
Ҳатто Маск уни триллионерга айлантириши мумкин бўлган IPO ўтказмаганда ҳам, бизнесменнинг SpaceX’даги 336 миллиард долларга баҳоланган улуши ҳозирда унинг энг қиммат активи ҳисобланади, деб ёзади Forbes.
Илон Маскнинг Tesla’даги 12 фоизлик улуши 197 млрд долларга баҳоланмоқда. Шунингдек, унга тегишли хАI Holdings компанияси (Grok чат-ботини яратган) ҳозирда 230 млрд доллар қиймат билан янги сармоя жалб қилиш бўйича музокаралар олиб бормоқда. Бу кўрсаткич Маск компанияни ташкил қилган пайтда айтилган 113 млрд долларлик баҳодан икки баробардан кўп.
2024-йилда таҳлилчилар Маск 2027-йилга бориб дунёдаги илк доллар триллионерига айланиши мумкин, деган тахминни илгари сурган. Улар буни Маск бойлиги ҳар йили ўртача икки баробарга яқин ошиб бораётгани билан изоҳлаган. Маск 2021-йилда Forbes рейтингида дунёнинг энг бой одами бўлган ва Аmazon асосчиси Жефф Безосни ортда қолдирган эди. Ўшанда унинг бойлиги 271 млрд доллардан ортиққа баҳоланган.
