Германия Украинага Patriot зенит-ракета тизимларини топширди. Бу ҳақда Украина Президенти Владимир Зеленский ўзининг Telegram-каналида маълум қилди.
“Биз мамлакатимизнинг ҳаво мудофааси тизимидаги Patriot компонентини мустаҳкамладик. Германияга ва шахсан канцлер Фридрих Мерцга Россия терроридан ҳаётни ҳимоя қилиш йўлидаги бу умумий қадамингиз учун миннатдорлик билдираман”, дейди Украина раҳбари.
Зеленскийнинг айтишича, ҳаво ҳужумлари Путиннинг бу урушдаги асосий қуроли бўлиб қолмоқда, чунки у ўзининг ердаги мақсадларига эриша олмаслигини айнан ҳаво орқали “қопламоқчи”. Зеленскийнинг билдиришича, ҳаво мудофааси тизимини кучайтириш урушнинг якунига яқинлаштиради ва Россиянинг ҳаво ҳужумларини давом эттириш имкониятларини камайтиради.
“Россиянинг муваффақиятлари қанча кам бўлса, у урушни тугатишга шунча кўпроқ туртки топади”, дейди у.
Зеленскийнинг сўзларига кўра, Украина ва унинг ҳамкорлари нафақат Украина ҳудудини, балки иттифоқчиларни ҳам ҳимоя қила оладиган комплекс ҳаво мудофааси тизимини яратиш устида ишламоқда. Украина Президенти хавфсизлик “бўлинмас” эканини таъкидлаган ва Украина ҳаво мудофааси “барчани ҳимоя қилишга” тайёр бўлиши кераклигини қайд этган. У шунингдек, ҳаво мудофааси тизимини янада кучайтириш бўйича музокаралар ҳукумат даражасида ҳам, қурол ишлаб чиқарувчилар билан ҳам давом этаётганини, яқин орада янги натижаларга эришилишини билдирган.
Қайд этилишича, ҳозирги ускуналар Бундесвер омборларидан Дания, Литва ва Норвегия молиявий ёрдами билан тақдим этилмоқда.
Маълумот учун, жорий йилнинг ёзида Германия канцлери Фридрих Мерц ва Норвегия Бош вазири Йонас Гар Стёре Украинага иккита тўлиқ MIM-104 Patriot тизимини топшириш ҳақида келишувга эришган. АҚШ Германия армияси ихтиёридаги комплексларни Киевга топшириш учун уларни янги тизимлар билан алмаштиришга розилик берган. Германия Мудофаа вазири Борис Писториус ўшанда таъминот Вашингтон билан келишилган ҳолда амалга оширилишини, Германия биринчи бўлиб янги тизимларни олишини билдирган.
Жорий йилнинг октабр ойида эса Зеленский Украина 25 та Patriot тизимини сотиб олиш бўйича шартнома тайёрлаётганини маълум қилган. Унга кўра, етказиб беришлар босқичма-босқич амалга оширилади ва ишлаб чиқарувчи компания имкониятларига қараб бир неча йилга тақсимланади.
Patriot – бу АҚШнинг Raytheon компанияси томонидан ишлаб чиқилган ўрта масофали зенит-ракета мажмуаси бўлиб, у самолётлар, қанотли ва баллистик ракеталарни уриб тушириш учун хизмат қилади. Комплекс таркибига бошқарув пункти, радар, йўналтириш станциялари ва учириш қурилмалари киради.
