Қашқадарё вилоятининг Қарши ва Шаҳрисабз туманларида 3 нафар фуқаро пора билан қўлга тушди. Бу ҳақда Давлат хавфсизлик хизмати хабар берди.
Маълум бўлишича, 2000 йилда туғилган фуқаро 12 сотих ер майдонини ноқонуний эгаллаб олган. Шундан сўнг унга нисбатан 82 млн сўм жарима белгиланган. Кадастр агентлигининг Қарши туман бўлими етакчи инспектори эса ўзининг мансабдор танишлари орқали жаримани бекор қилиш ва мазкур ер участкасининг кадастр ҳужжатларини тайёрлаб бериш эвазига 2 минг доллар талаб қилган. Гумонланувчи талаб қилинган пулларни олган вақтида ашёвий далиллар билан ушланган.
Иккинчи ҳолатда эса муқаддам фирибгарлик билан боғлиқ жинояти учун судланган 59 ёшли шахс ва Давлат кадастрлари палатасининг Шаҳрисабз туман филиали ходими ўзаро тил бириктирган. Улар маҳаллий деҳқон хўжалигига тегишли 9 сотих ер майдонини мансабдор танишлари орқали қурилиш фаолияти билан шуғулланувчи хусусий корхона раҳбари номига расмийлаштириб бериш эвазига 7 минг АҚШ доллари талаб қилган.
Шундан сўнг, олдиндан 4 минг долларни олган вақтларида ҳуқуқ тартибот органлари ходимлари томонидан қўлга олинган.
Ҳозирда ҳар икки ҳолат бўйича ҳам жиноят ишлари қўзғатилиб, тергов ҳаракатлари олиб борилмоқда.
