Доғистоннинг Қизилюрт шаҳридаги магистрал газ қувурида учта катта портлаш содир бўлиб, йирик ёнғин келиб чиқди. Бу ҳақда Доғистон Фавқулодда вазиятлар вазирлиги хабар берди.
Маълум қилинишича, кеча, 9 июнь куни Доғистоннинг Қизилюрт шаҳрида “Моздок – Казимагомед” магистрал газ қувурида учта портлаш содир бўлган. Қувур “Газпром трансгаз Махачкала” МЧЖ компаниясига тегишли бўлиб, портлашлардан кейин йирик ёнғин бошланган.
Доғистон ФВВ маълумотига кўра, ҳодисага Қизилюрт туманидаги Бавтуғай ва Гельбах аҳоли пунктлари оралиғида қувурнинг герметиклиги бузилиши сабаб бўлган. Портлашлардан кейин чиққан аланганинг баландлиги 15 метргача етган. Фавқулодда хизматлар ёнғинни икки соатдан ортиқ вақт давомида ўчирган.
Маҳаллий ҳокимият маълумотига кўра, ҳодиса оқибатида ҳалок бўлганлар ва жабрланганлар йўқ. Қизилюрт шаҳри раҳбари Саид Маматхановнинг ТАСС агентлигига маълум қилишича, Қизилюрт туманида яшовчи қарийб 140 нафар аҳоли эвакуация қилиниб, қариндошлари уйларига жойлаштирилган.
Қайд этилишича, ҳодиса туфайли Қизилюрт шаҳри, шунингдек, Қизилюрт ва Кумторқалин туманларидаги қатор қишлоқларда яқин бир сутка давомида газ таъминоти тўхтатилган. Фавқулодда вазиятлар вазирлиги маълумотига кўра, “Газпром трансгаз Махачкала” МЧЖ диспетчери аҳолида уч кунлик газ захираси мавжудлигини билдирган.
Маълумот учун, “Моздок – Казимагомед” газ қувури Доғистоннинг бир қатор туманларини газ билан таъминлайди. Шунингдек, у “Газпром” томонидан табиий газни жанубий йўналишга, жумладан, Озарбайжонга етказиб бериш учун ҳам фойдаланилади.
