Ҳиндистонда бортида Маҳараштра бош вазири ўринбосари Ажит Павар бўлган самолёт 28 январь куни тонгда ҳалокатга учради. Ҳодиса оқибатида беш киши ҳалок бўлди. Бу ҳақда Фуқаролик авиацияси бош бошқармасига таяниб, NDTV хабар берди.
Қурбонлар орасида Павардан ташқари хавфсизлик хизмати ходимлари ва учувчилар бор. Самолёт Мумбайдан тахминан соат 8.10 да ҳавога кўтарилган. У ярим соатдан кейин Барамати аэропорти яқинида қўнишга уриниш чоғида ҳалокатга учраган. Воқеа жойидан олинган видеодан самолётнинг парчаланган қолдиқлари ва тез ёрдам машиналари ярадорларни яқин атрофдаги шифохоналарга олиб кетаётганини кўриш мумкин.
66 ёшли Ажит Павар келаси ой бўлиб ўтадиган маҳаллий сайловлар олдидан тўртта муҳим жамоатчилик йиғилишида иштирок этиши режалаштирилган эди. У машҳур сиёсатчи, НCП партияси асосчиси Шарад Паварнинг жияни, Лок Сабҳа депутати Суприя Суленинг эса амакиваччаси ҳисобланади.
Ҳиндистон президенти Дроупади Мурму амалдорнинг вафоти муносабати билан чуқур ҳамдардлик билдирди. У бу воқеани “ниҳоятда аянчли” дея баҳолади.
“Маҳараштра штатининг Барамати шаҳрида содир бўлган авиаҳалокат оқибатида бир неча киши, жумладан, штат бош вазири ўринбосари Шри Ажит Павар ҳалок бўлгани ҳақидаги хабар ниҳоятда фожиалидир. Ажит Паваржининг бевақт вафоти ўрнини тўлдириб бўлмайдиган йўқотишдир”, деди Мурму ҳинд тилидаги мурожаатида.
Шунингдек, у марҳумнинг оила аъзолари, тарафдорлари ва уни ҳурмат қилган барча инсонларга чуқур ҳамдардлик билдирди.
