Исроил кеча, 23 ноябрь куни Ғазо секторига уюштирилган ҳужумда ҲАМАС ҳаракатининг маҳаллий қўмондонларидан бирини йўқ қилди. Бу ҳақда Исроил ҳарбийлари ўзининг Х саҳифасида хабар берди.
Маълум қилинишича, ўлдирилган шахс Алаа ал-Ҳадиди ҳисобланади, у ҲАМАСнинг ишлаб чиқариш штабида таъминот хизмати раҳбари лавозимида фаолият юритган. Ал-Ҳадиди Ғазо секторида ўтказилган операциялардан бири давомида йўқ қилинган. ҲАМАС унинг ўлими ҳақидаги хабарларга ҳозирча муносабат билдирмаган. Шу билан бирга, Исроил ва фаластинлик гуруҳ бир-бирини ўт очишни тўхтатиш режимини бузишда айбламоқда.
Исроил Бош вазири Биньямин Нетаньяху зарбалар ҲАМАС жангчисининг Исроил назоратидаги ҳудудга юборилишига жавоб бўлганини билдирган. Унинг сўзларига кўра, ҳужумлар оқибатида ҲАМАСнинг беш нафар юқори мартабали аъзоси йўқ қилинган.
Ўз навбатида, Ғазо соғлиқни сақлаш идоралари Исроил зарбалари оқибатида камида 20 нафар фаластинлик ҳалок бўлганини маълум қилди. ҲАМАС сулҳ бузилишида Исроил армиясини айбламоқда ва АҚШга жангларни қайта бошлашга тайёр экани ҳақида маълумот етказган.
Исроил ва ҲАМАС ҳаракати ўртасида ўт очишни тўхтатиш бўйича келишув 10 октябрь куни кучга кирган. Бироқ у бир неча бор бузилган ва томонлар ҳужумларда бир-бирини айблаб келмоқда.
28 октябрь куни кечқурун Исроил армияси сулҳ келишувига қарамай, Ғазонинг марказий қисмига бир неча бор зарба берди. Ҳаво ҳужумлари бошланганидан сўнг ҲАМАС раҳбарияти сулҳга содиқ қолишини билдирди. Бироз вақт ўтиб, АҚШ Президенти Дональд Трамп бу зарбалар сулҳга таъсир кўрсатмаслигини айтди. Шунингдек, у Исроил анклавга зарба беришга “ҳақли бўлганини” ва ҲАМАС “ўзини муносиб тутиши кераклигини” таъкидлади.
