Тошкентда Британия компаниялари чиқиндиларни қайта ишловчи завод қуради. Бу ҳақда “Дунё” ахборот агентлиги хабар берди.
Маълум қилинишича, Тошкент шаҳар ҳокими ўринбосари Абдулазиз Исроилов бошчилигидаги делегация Лондонга ташриф доирасида чиқиндиларни қайта ишлаш соҳасида Ўзбекистон ва Британия ўртасидаги ҳамкорликка бағишланган бизнес-форумда иштирок этди.
Ўзбекистоннинг Буюк Британиядаги элчихонасида ташкил этилган тадбирда Британия Экспортни молиялаштириш агентлиги (UKEF), CDE Group, Kiverco, Fichtner, Operis каби компаниялар вакиллари ва йирик сармоядорлар қатнашди.
Чиқиндиларни қайта ишлаш бўйича асбоб-ускуналар ишлаб чиқарувчи дунёдаги етакчи Британия компаниялари – CDЕ Group ва Kiverco томонидан Ўзбекистонда режалаштирилган лойиҳалар бўйича тақдимот ўтказилди. Якунда ушбу икки компания томонидан Тошкентда қурилиш режалаштирилган чиқиндиларни қайта ишловчи завод бўйича битим имзоланди.
Хабарда қайд этилишича, Ўзбекистон делегациянинг Лондонда жойлашган чиқиндиларни қайта ишлаш объектларига сафари ташкил этилиб, ушбу йўналишдаги Британиянинг илғор тажрибаси ҳам ўрганилди.
