Ўзбекистонда АҚШ фуқаролари учун визасиз режим жорий этилди. Бу ҳақда президентнинг тегишли фармони қабул қилинди.
Унга кўра, 2026 йил 1 январдан бошлаб АҚШ фуқаролари учун Ўзбекистон ҳудудига кирган кундан бошлаб 30 кунгача муддатга визасиз режим белгиланади.
Ўзбекистон ва АҚШ ўртасидаги ҳамкорлик
Ўзбекистон ва АҚШ ўртасида савдо айланмаси ҳажми йил сайин ортиб бормоқда. Масалан, 2024-йилда республика қўшма штатларга 431 миллион долларлик товар ва хизматлар экспорт қилган. Бу кўрсаткич 2014-йилдагидан (42,4 миллион доллар) 10 баравар кўп. Умуман олганда, мамлакат экспортида Америка улуши 10 йил ичида 0,3 фоиздан 1,6 фоизга ўсди. Мазкур рақамлар республика маҳсулот ва хизматлари экспорти юқори қийматли бозорлар томон диверсификация қилинаётганидан дарак беради.
2025 йил бошида АҚШ барча имтиёзсиз мамлакатлардан импорт қилинадиган товарларга 10 фоиз базавий тариф жорий этди, айрим савдо ҳамкорлари учун эса бундан юқори ставкалар белгиланди.
Ушбу шароитда Ўзбекистон базавий тоифадаги давлат сифатида АҚШнинг ўртача тариф ставкасининг кескин ошишига дуч келди. Бунда АҚШнинг Ўзбекистондан импорти учун ўртача тариф ставкаси 2024-йилдаги 3,8 фоиздан 2025-йилда 18,1 фоизга кўтарилди. Айниқса, ёқилғи ва кон маҳсулотлари (29,5 фоиз) ҳамда ишлаб чиқариш сектори (14,5 фоиз) бўйича тарифларнинг сезиларли ошиши ўзбекистонлик экспортёрлар учун бозорга киришни қийинлаштириб, паст маржали маҳсулотлар экспорти рақобатбардошлигини пасайтириши мумкин.
АҚШ билан савдо алоқаларини мустаҳкамлаш Ўзбекистоннинг узоқ муддатли диверсификация кун тартиби учун муҳим стратегик мақсад бўлиб қолмоқда.
