Сейсмопрогностик мониторинг маркази 11 ноябрь куни соат 22:32 да мамлакат ҳудудида зилзила содир бўлганини маълум қилди.
Ер силкинишининг магнитудаси 3,9 ни ташкил этган, чуқурлиги эса 16 километрни ташкил қилади. Зилзила эпицентри Наманган вилоятининг Косонсой туманида, Тошкентдан 193 километр жануби-шарқда жойлашган.
Эпицентрда ер силкиниши 4 балл, вилоят ҳудудида эса 2–3 балл атрофида сезилган.
- Бундан 3 кун аввал, 8 ноябрь куни соат 09:14:19 да ҳам зилзила содир бўлган эди. Зилзиланинг магнитудаси 3,2 ни ташкил этган, чуқурлиги 10 километр бўлган. Зилзила эпицентри Бухоро вилоятининг Газли шаҳри ҳудудида, Тошкентдан 506 километр жануби-ғарбда жойлашган.
Афғонистонда 2025 йил 3 ноябрь куни содир бўлган зилзила Ўзбекистон ҳудудларида, хусусан, Сурхондарёда 4-5 балл атрофида сезилиши ортидан аҳолида яна ер қимирлаши билан боғлиқ хавотирлар пайдо бўлганди. Маълум қилинишича, Сейсмопрогностик мониторинг республика марказида қўшма прогностика комиссия мавжуд. Бу комиссия Ўзбекистон ҳудудидаги сейсмик ҳолат тўғрисида ахборот беради.
Улар яқинда берган маълумотларга кўра, жорий йил охиригача Ўзбекистон ҳудудида магнитудаси 5 ва ундан юқори бўлган зилзила кутилмайди.
