CEPI глобал соғлиқни сақлаш ташкилоти Moderna ва яна иккита гуруҳга қарийб 60 миллион доллар ажратади. Бу маблағ эбола вирусининг Бундибугё штаммига қарши вакциналар ишлаб чиқишни тезлаштиришга йўналтирилади. Хавфли вирус Конго Демократик Республикаси (КДР) шарқида тарқалмоқда.
Эпидемияларга инновацион тайёргарлик кўриш коалицияси (CEPI) COVID-19 пандемияси даврида вакцина яратишга биринчилардан бўлиб сармоя киритган эди. Ташкилот раҳбари Ричард Ҳатчетт 1 июнь куни Reuters агентлигига баёнот бериб, Эбола Бундибугё (BDBV) вакциналарини бир неча ой ичида синовларга тайёрлаш мумкинлигини айтди. Ҳозирда ушбу вирусга қарши тасдиқланган вакцина ёки даволаш усули мавжуд эмас.
Ҳатчеттнинг таъкидлашича, вакциналарнинг тез орада тайёр бўлиши муҳим аҳамиятга эга. Бу уларни ким сотиб олиши ва тарқатишни ким молиялаштириши ҳақида ҳозирдан музокаралар бошлаш имконини беради.
Африка касалликларни назорат қилиш ва олдини олиш марказлари ҳамда ЖССТ маълумотларига кўра, КДРда 282 та касалланиш ҳолати тасдиқланган. Беморларнинг 42 нафари вафот этган, 1100 нафарга яқин касалликда гумон қилинаётганлар бор. Угандада яна тўққизта ҳолат тасдиқланган, бир киши вафот этган. Глобал соғлиқни сақлаш агентликлари ушбу эпидемияни фавқулодда ҳолат деб эълон қилди.
Moderna вакцинасининг дастлабки клиник синовлари
CEPI Moderna компаниясининг BDBV вакцинасини клиникагача ва дастлабки клиник ривожлантириш учун 50 миллион долларгача маблағ ажратди. Агар дастлабки натижалар ижобий бўлса, бу маблағ ишлаб чиқариш ва кейинги босқич синовларига ҳам йўналтирилади.
Шунингдек, CEPI Оксфорд университети томонидан тайёрланган ва Serum Institute оf India томонидан ишлаб чиқариладиган вакцина учун 8,6 миллион долларгача инвестиция киритади. Халқаро ОИВ вакцинаси ташаббуси (IAVI) ташкилоти томонидан ишлаб чиқилган вакцина учун эса дастлабки босқичда 3,2 миллион доллар ажратилади.
Ҳатчетт вакцина яратилгандан кейинги асосий вазифа уни керакли жойларга етказиб бериш эканини айтди. Унинг сўзларига кўра, 2018—2020 йилларда Конгода Эбола Заир эпидемиясини назорат остига олиш учун 300 минг доза Эрвебо вакцинаси керак бўлган эди.
Бундан ташқари, жума куни Gavi глобал вакцина иттифоқи Эболага қарши кураш учун 50 миллион долларгача маблағ ажратди. Жаҳон банкининг Пандемия жамғармаси эса 220,6 миллион долларгача грант беришини эълон қилди.
Хитой эболага қарши кураш учун Африкага шошилинч тиббий гуруҳ юборади
Хитой Конго Демократик Республикаси (КДР)га фавқулодда ёрдам сифатида шифокорлар жамоасини юбормоқда. Улар мамлакатда тарқалган эбола эпидемиясига қарши курашишда ёрдам беради.
Вазирлик матбуот котиби Лин Сзяннинг таъкидлашича, бу ёрдам Хитойнинг Африка давлатларини эпидемияга қарши қўллаб-қувватлаш бўйича саъй-ҳаракатларининг бир қисмидир. Хитой нафақат Конго ДРга, балки Африка Иттифоқи комиссиясига ҳам кўмак кўрсатади. Шунингдек, эпидемиядан ҳимояланиш ва уни назорат қилиш бўйича ҳамкорликни йўлга қўяди.
