Квант технологиялари асосида ишловчи илк ўйинлардан бири ҳисобланган “Quantum Backrooms” кенг жамоатчиликка тақдим этилди. Лойиҳа квант ҳисоблаш имкониятларидан фойдаланиб, ҳар сафар ўзига хос ва тасодифий ўйин муҳитини яратиши билан ажралиб туради.
Ўйин машҳур “Backrooms” концепциясига асосланган бўлиб, унда ўйинчи чексиз йўлаклар, бўш офис хоналари ва мураккаб лабиринтлардан иборат сирли маконда ҳаракатланади.
Лойиҳани ишлаб чиққан Moth компанияси маълум қилишича, ўйин лабиринтларини яратишда ҳақиқий квант платформалари — IBM Quantum ва IQM Quantum Computers тизимларидан фойдаланилган. Бу эса мазкур ўйинни квант компьютерлари архитектурасига асосланган илк лойиҳалардан бирига айлантиради.
Ўйиннинг асосий ғояси шундан иборатки, квант процессордаги ҳар бир кубит ўйин дунёсидаги алоҳида ҳудудга мос келади. Кубитлар ўртасидаги боғланишлар эса лабиринт ичидаги йўлларни белгилайди. Натижада ўйин даражалари тузилиши тўғридан-тўғри ҳақиқий квант процессори дизайни асосида шаклланади.
Бу Moth компаниясининг квант технологиялари асосидаги биринчи тажрибаси эмас. Компания аввалроқ IBM Quantum, IQM ва Финляндиянинг VTT тадқиқот маркази ҳамкорлигида Roblox платформаси учун “Space Moths” номли кўп ўйинчили лойиҳани ҳам ишлаб чиққан эди.
Бироқ “Space Moths” асосан технология намойиши вазифасини бажарган бўлса, “Quantum Backrooms” оддий фойдаланувчилар учун мўлжалланган тўлиқ ўйин ҳисобланади.
Мутахассислар фикрича, бундай лойиҳалар квант технологияларини оммалаштириш ва уларни кенг жамоатчиликка тушунарлироқ қилишда муҳим аҳамият касб этади.
