АҚШда тасодифан чиқиндилар билан бирга прессланган эркак омон қолди, жабрланувчи оғир тан жароҳати олган. Бу ҳақда Daily Mail хабар берди.
Ҳодиса Миссисипи штатидаги ёнилғи қуйиш шохобчаси ёнидаги контейнерда юз берган. Крейг Ҳилл исмли эркак контейнердан ниманидир олиш учун унинг ичига тушган. Бироқ у чиқиб кетишга улгурмасидан махсус техника уни чиқиндилар билан бирга юклаган. Чиқинди ташувчи машина ҳайдовчиси эркакнинг ёрдам сўраб чақирганини эшитмаган ва пресслаш механизмини ишга туширган.
Воқеа жойига етиб келган ўт ўчирувчилар жабрланувчига дастлабки тиббий ёрдам кўрсатган. Шундан сўнг у зудлик билан Жексон шаҳридаги Миссисипи университети тиббиёт марказига олиб кетилган. Эълон қилинган фотосуратларда эркакнинг бутун танасида кучли кўкаришлар борлиги акс этган.
Шифокорлар операция ўтказиб, тосга металл пластиналар ва штифтлар ўрнатган. Эркакни кўриш учун Техасдан синглиси етиб келган, у акасига молиявий ёрдам кўрсатиш учун онлайн хайрияни ишга туширган.
