Қозоғистоннинг Қостанай вилоятида археологлар тош даврига оид ноёб дафн жойларини аниқлади. Аҳмад Бойтурсинов номидаги Қостанай минтақавий университети экспедицияси Овулкўл туманидаги Шили археологик ёдгорлигида милоддан аввалги VII–V минг йилликларга тегишли учта қабристонни топди. Бу ҳақда “Kazinform” хабар берди.
Маълумотларга қараганда, топилмалар қадимги Маҳанжар маданиятига мансуб бўлиб, улар қадимги турар жойларнинг пол қисми остидан аниқланган. Археологлар бу ҳудудда тадқиқот олиб бораётган пайтда бола ва икки нафар катта ёшли кишининг дафн қолдиқларини топган.
Мутахассислар бундай даврга оид қабристонлар жуда кам учрашини таъкидламоқда. Археолог Ирина Шевнинанинг сўзларига кўра, топилма Қозоғистон, хусусан, Қостанай вилояти учун муҳим илмий кашфиёт ҳисобланади.
Экспедиция давомида тош ва суякдан ясалган меҳнат қуроллари, сопол буюмлар ҳамда қадимий безаклар ҳам топилган. Бундан ташқари, олимлар Маҳанжар маданиятига оид қадимги ярим ертўла уй-жой қолдиқларини ҳам ўрганмоқда.
Тадқиқотчиларнинг фикрича, қадимги одамларни уй полининг остига дафн қилиш анъанаси Марказий Осиёдаги айрим неолит даврида ҳам учраган. Ушбу топилмалар орқали олимлар ўша давр одамларининг турмуш тарзи, эътиқодлари ва ижтимоий ҳаёти ҳақида янги маълумотлар олишни режалаштирмоқда.
Қазиш ишлари давом этмоқда. Мутахассислар топилган қолдиқларни чуқур ўрганиб, уларнинг аниқ ёши ва тарихий аҳамиятини аниқлаш устида ишламоқда.
