Бугун, 11 июль куни “Қамчиқ” довонида Lacetti автомобили ёниб кетди. Бу ҳақда “Қамчиқ” махсус қутқарув бошқармаси хабар берди.
Қайд этилишича, соат 17:50 да “Қамчиқ” махсус қутқарув бошқармасига довондан ўтган А-373 автомобиль йўлининг “Тошкент–Водий” йўналишида ҳаракатланган Lacetti русумли енгил автомобилда ёнғин бўлаётгани тўғрисида хабар келиб тушган.
Шунга кўра, “Қамчиқ” махсус қутқарув бошқармасининг қутқарув экипажлари тезкорлик билан етиб бориб, ёнғинни тўлиқ бартараф этган.
Дастлабки маълумотларга кўра, автомобиль ҳайдовчиси бошқарувни йўқотиб, йўл четидаги темир тўсиққа урилган. Тўқнашув оқибатида автомобильнинг электр тизимида қисқа туташув юзага келиб, ёнғин содир бўлган. Автомобилда ёлғиз бўлган ҳайдовчи дарҳол транспорт воситасидан тушиб, хавфсиз жойга чиққан.
Билдирилишича, ҳозирда ёнғин сабаби ва моддий зарар миқдори аниқланмоқда. Ҳодиса оқибатида тан жароҳати олганлар йўқ.
