Андижон вилоятида 3 минг доллар эвазига қотил ёллаб, эрини ўлдирмоқчи бўлган 52 ёшли аёл қўлга олинди. Бу ҳақда вилоят Ички ишлар бошқармаси хабар берди.
Қайд этилишича, олинган тезкор маълумотларга кўра, вилоятнинг Асака туманида яшовчи 1974 йилда туғилган аёл ўзи билан бирга яшовчи 1972 йилда туғилган собиқ турмуш ўртоғини уй-жой низоси билан боғлиқ адоват заминида қасддан ўлдиришни мақсад қилиб, 3000 АҚШ доллари эвазига ёлланма қотил излаётгани аниқланган.
Шундан сўнг, тезкор тадбир ўтказишга киришилиб, шартли ёлланма қотил тадбирга жалб этилган. 1974 йилда туғилган аёл собиқ турмуш ўртоғини қасддан ўлдириш жиноий режасини тезроқ амалга ошириш мақсадида жорий йилнинг 10 июль санасида Асака туманидаги тураржой мажмуаларидан бирининг олдига қотиллик бўйича ёлламоқчи бўлган шахслар билан кўришиб, гаплашиб олган. Собиқ турмуш ўртоғини ўлдириши эвазига дастлаб 5 миллион сўм пул берган. Кейинчалик эса эрининг ўлганига ишонч ҳосил қилгандан сўнг, қолган пулни беришни ваъда қилиб, тилхат ёзиб берган. Натижада 11 июлга ўтар кечаси ўтказилган тезкор тадбирда ёлланма қотил аёлнинг турмуш ўртоғини Асака туманидаги адирлик дала майдонига олиб бориб, уни қасддан ўлдирилганлигини гриммланган ҳолатда кўрсатиб, буюртмачи аёлни воқеа жойига чақирган. Ўлганлигига ишонч ҳосил қилган аёл келишилган пулни беришини айтиб, автомашинага ўтирган вақтда далилий ашёлар билан қўлга олинган.
Билдирилишича, мазкур ҳолат юзасидан собиқ эрини қасддан ўлдирмоқчи бўлган аёлга нисбатан Жиноят кодексининг 25,97-моддаси 2-қисми “и” банди билан жиноят иши қўзғатилган.
“Эримдан қутулиш учун ёлланма қотилга 3000 доллар беришга келишдик. 5 миллионини бердим. Қилган ишимдан пушаймонман. Кечиришингизни сўрайман”, дейди аёл.
