АҚШнинг Колорадо штатида 30 дан ортиқ автомобиль тўқнашди, тўрт киши ҳалок бўлди. Бу ҳақда New York Post хабар берди.
Ҳодиса 17 февраль куни кучли шамол пайтида Пуэбло шаҳри яқинидаги автомагистралда юз берган. Тўқнашувда бир нечта юк машиналари, пикаплар ва енгил автомобильлар иштирок этган. Турли транспорт воситаларида бўлган тўрт киши ҳалок бўлган. Колорадо штати патрул хизмати ходими Брайан Лаёнс камида 29 киши енгил ва оғир тан жароҳатлари билан маҳаллий шифохоналарга олиб кетилганини айтди.
Кучли шамол чангни кўтариб, йўлда кўриш масофасини кескин ёмонлаштирган. Аварияга учраган автомобиллар орасида 32 та эчкини олиб кетаётган тиркамали пикап ҳам бўлган. Ҳодиса оқибатида тўртта эчки нобуд бўлган, қолганлари эса хавфсиз олиб кетилган. Ҳозирда ҳодиса юзасидан тергов давом этмоқда. Расмийлар дастлабки тўқнашув қандай содир бўлганини аниқламоқда.
Шунга ўхшаш ҳолат 2025 йилда Японияда ҳам кузатилган эди. Ўшанда кучли қор ёғиши ва музлама туфайли 57 та машина бир-бири билан тўқнашиб кетган. Ҳодиса Минаками шаҳри яқинидаги Канецу маҳаллий тезюрар йўлларининг бирида содир бўлган. Ҳодиса оқибатида камида 10 та автомобиль ёниб кетган, 2 киши ҳалок бўлган, 26 киши жароҳат олган эди.
