АҚШнинг Калифорния штати, Палм-Дезерт шаҳрида профессионал бокс оқшоми бўлиб ўтди. Турнир доирасида ўзбекистонлик чарм қўлқоп устаси Руслан Абдуллаев профессионал рингдаги тўртинчи жангини ўтказиб, навбатдаги ғалабасини қўлга киритди.
Ўзбекистонлик спортчи бокс кечасида уругвайлик Эдуардо Хавьер Абреуага қарши рингга кўтарилди. Саккиз раундга мўлжалланган баҳс бешинчи раундда якунига етди. Кетма-кет кучли зарбалардан сўнг Эдуардо нокдаун ҳолатига тушиб қолди ва рефери жангни тўхтатишга мажбур бўлди.
Шу тариқа, Руслан Абдуллаев техник нокаут эвазига профессионал фаолиятидаги тўртинчи ғалабасини қўлга киритди. 37 ёшли Эдуардо Хавьер Абреуа эса фаолиятидаги иккинчи мағлубиятини қабул қилди. Уругвайлик боксчининг ҳисобида 18 та жангда 14 ғалаба ва 2 дуранг мавжуд.
Маълумот учун, Руслан Абдуллаев 2023-йилда Тошкент шаҳрида ўтказилган IBA Жаҳон чемпионатида -63,5 кг вазн тоифасида олтин медални қўлга киритган. У профессионал боксдаги дебют жангини 2025 йил март ойида Хосе Алварадога (3-19-1, 2 КО) қарши ўтказиб, иккинчи раундда уни нокаутга учратган эди. Кейинги жангида Абдуллаев Жино Родригони (13-4-2, 11 КО) ҳакамларнинг якдил қарори билан (80-71) мағлуб этди. Учинчи жангда эса Кевин Жонсонга (12-7, 8 КО) қарши рингга чиқиб, ҳакамлар қарорига кўра (80-72, 79-73, 79-73) ғалаба қозонган.
