Ўзбекистонда 2025 йилда бирламчи автомобиль бозори ижобий динамикани сақлаб қолди. Иқтисодий тадқиқотлар ва ислоҳотлар маркази томонидан тақдим этилган таҳлилий шарҳда маҳаллий ва импорт ишлаб чиқарилган янги енгил автомобиллар савдоси, шунингдек, бозорнинг ҳудудий тузилмаси ва асосий сегментларидаги ўзгаришлар ёритилди.
Маълумотларга кўра, 2025 йил давомида янги енгил автомобиллар савдоси 5,2 фоизга ошиб, қарийб 370 минг донани ташкил этди. Ҳудудлар кесимида энг юқори савдо фаоллиги Сирдарё вилоятида қайд этилган бўлиб, бу ерда ўсиш 45 фоизни ташкил қилди. Шунингдек, Тошкент вилоятида 36 фоиз, Наманган вилоятида 26 фоиз ва Қашқадарё вилоятида 21 фоизлик ўсиш кузатилди. Шу билан бирга, йил давомида Тошкент шаҳри, Навоий ва Хоразм вилоятларида янги автомобиллар реализацияси ҳажмининг қисқаргани қайд этилди.
Таҳлилда қайд этилишича, ўтган йилда маҳаллий ишлаб чиқарилган янги автомобиллар савдоси 315 минг донадан ошган. Импорт автомобиллар сегментида эса реализация ҳажми тахминан 53,3 минг дона атрофида шаклланган. Бу кўрсаткичлар ички бозорнинг асосий қисмини ҳануз маҳаллий ишлаб чиқарувчилар таъминлаб келаётганини кўрсатади.
Электромобил лар бозори 2025 йилда энг тез ривожланган сегментга айланди. Ҳисоботга кўра, янги электромобиллар савдоси йил давомида 35 фоизга ошиб, 40,7 минг донага етган. Ушбу сегмент умумий бозор ўсишини таъминлаган асосий драйверлардан бири сифатида баҳоланган.
Ҳудудий таҳлил электромобиллар савдоси асосан пойтахтда жамланганини кўрсатади. Хусусан, Тошкент шаҳрида 29 мингта янги электромобиль сотилган бўлиб, бу умумий ҳажмнинг 71 фоизини ташкил этади. Кейинги ўринларда Самарқанд вилояти, Тошкент вилояти ва Қашқадарё вилояти қайд этилган.
Марказ мутахассисларининг таъкидлашича, 2025 йил натижалари автомобиль бозорида ҳудудий тафовутлар сақланиб қолаётганини, шунингдек, электромобиллар сегменти келгусида ҳам бозор ривожининг асосий йўналишларидан бири бўлиб қолишини кўрсатмоқда.
