ОАВ номи остида фаолият юритиб, фуқаролар ва тадбиркорларга товламачилик қилишда гумонланаётган “Taftish.uz” интернет-нашри ходимларига оид жиноят иши доирасида янги тафсилотлар маълум бўлди.
Аниқланишича, жиноий гуруҳга раҳбарлик қилган 1988 йилда туғилган Ғайрат Абераев ўзини ОАВ раҳбари сифатида кўрсатиб, турли ҳудудлардаги можароли вазиятларни бир томонлама ёритувчи видеоматериаллар тайёрлашни йўлга қўйган. Ушбу видеоларда фуқаролар, тадбиркорлик субъектлари ва айрим ташкилотларнинг шаъни ва қадр-қиммати камситилган. Кейинчалик мазкур материалларни интернетдан олиб ташлаш ёки янги видеолар чиқармаслик эвазига пул талаб қилингани айтилмоқда.
Терговга кўра, Абераев гуруҳ аъзолари — Азизжон Юлдашев, Дилшод Нишонов ва Маржона Эшқувватова билан биргаликда Тошкент шаҳри, Тошкент вилояти, Наманган, Самарқанд ҳамда Қорақалпоғистон Республикасида фуқаролар мурожаатлари асосида видеолар тайёрлаб, уларни “Taftish.uz” номидан YouTube ва бошқа ижтимоий тармоқларга жойлаштириб келган. Айрим ҳолатларда ушбу материаллар атайлаб кескин ва баҳсли руҳда тайёрлангани қайд этилган.
Жиноят иши доирасида бир нечта аниқ эпизодлар келтирилмоқда. Жумладан, савдо мажмуаси, қурилиш компаниялари ҳамда оилавий низолар билан боғлиқ ҳолатлар юзасидан тайёрланган видеолар кейинчалик молиявий босим воситасига айлантирилган. Тадбиркорлар ва фуқаролардан видеоларни ўчириш ёки кейинги материалларни чиқармаслик эвазига миллионлаб сўм талаб қилингани айтилмоқда.
Азизжон Юлдашев илгари судланмаган, бироқ терговга кўра, у жиноий гуруҳнинг фаол ижрочиларидан бири бўлган. У ижтимоий тармоқларда кескин ва ҳақоратомуз чиқишлари билан танилиб, фуқаролар ва мансабдор шахсларга босим ўтказишда иштирок этган. Юлдашев шармандалик келтирувчи видеолар тайёрлаш ва уларни кейинчалик молиявий талаблар билан боғлашда фаол қатнашгани қайд этилган.
Дилшод Нишонов аввал ҳам ёлғон ахборот тарқатиш ва шахсий маълумотларга оид қонунбузарликлар учун маъмурий жавобгарликка тортилган. Тергов материалларига кўра, у оилавий низолар ва жанжалларни атайлаб кескин руҳда ёритиб, бир томон шаъни ва қадр-қимматини камситувчи кўплаб видеолар тайёрлаган. Айрим ҳолатларда у жабрланувчилардан видеоларни ўчириш эвазига пул талаб қилгани айтилмоқда.
Маржона Эшқувватова илгари ёлғон ахборот тарқатиш бўйича жавобгарликка тортилган. Терговда у ижтимоий тармоқларда давлат органлари ходимларини обрўсизлантирувчи материаллар жойлагани, шунингдек, йўл ҳаракати қоидаларини мунтазам бузиб келгани аниқланган. Хусусан, у ҳайдовчилик гувоҳномасига эга бўлмасдан транспорт воситасини бошқарган, автомашинаси жарима майдонига қўйилганидан кейин ҳам қоидаларни менсимасдан яна ўнлаб қоидабузарликларга йўл қўйгани қайд этилган.
Ҳуқуқ-тартибот органлари таъкидлашича, мазкур иш журналистика ёки блогерлик фаолиятига қарши қаратилмаган бўлиб, фақат фуқароларнинг мурожаатлари асосида аниқ шахсларнинг қонунга хилоф ҳаракатларига ҳуқуқий баҳо берилмоқда. Ҳозирда иш бўйича тергов ҳаракатлари давом эттирилмоқда.
