Президент Шавкат Мирзиёев 1 декабрь куни космик технологиялар соҳасидаги янги ташаббуслар, хусусан, “Самарқанд-2028” сунъий йўлдошини ишлаб чиқиш ишларининг бориши билан танишганди. Ушбу сунъий йўлдош Хитой билан ҳамкорликда учирилади.
Рақамли технологиялар вазирининг биринчи ўринбосари Олег Пекос “Ўзбекистон 24” телеканалига интервьюсида лойиҳа тафсилотларини маълум қилди.
“2026-йилда Хитой билан ҳамкорликда “Самарқанд-2028” деб номланадиган сунъий йўлдошни учириш режалаштирилган. Ушбу йўлдошга пахта ва дон экинлари вегетациясини аниқлаш бўйича бизнинг модел жойлаштирилади. Бу эса тезкор реакция вақтини қисқартириш, аниқ тасвирларни олиш ва ерни зондлаш тасвирларини алоҳида ерга юбориш, қайта таҳлил қилиш заруратини бартараф этиш имконини беради. Чунки спектрал таҳлил 22 дан ортиқ спектр асосида шу ернинг ўзида амалга оширилади. Ушбу йўналишда жуда фаол иш олиб борилмоқда. Биз томонидан сунъий интеллект модели тақдим этилади. Чунки мамлакатимизда пахта экинлари ва уларнинг вегетациясини аниқлаш бўйича катта тажриба мавжуд. Хитойлик ҳамкорлар эса қайта ишлаш учун зарур тасвирларни тақдим этади ва барча 22 спектр бўйича тайёр натижа бизга етказиб берилади”, деди Олег Пекос.
Президент матбуот хизмати хабарига кўра, ерни масофавий зондлашга мўлжалланган мазкур йўлдош учун сунъий интеллект модули ишлаб чиқилади. Йўлдош олган суратларни ҳаво сифатини бирламчи баҳолаш, қишлоқ хўжалиги экинлари ва ўрмонларни мониторинг қилишда қўллаш мумкин бўлади.
24 ноябрь куни “Ўзкосмос” сунъий йўлдош технологиялари ва космик иловаларни ривожлантириш бўйича Хитойнинг STAR.VISION компанияси билан стратегик меморандум имзолаганди. Томонлар қўшма лойиҳаларни амалга ошириш, илмий ва технологик интеграцияни кучайтириш, университетлар ва компаниялар билан ҳамкорлик қилишга келишиб олди.
STAR.VISION ўзининг гиперспектрал сунъий йўлдошларидан бирига “Самарқанд-2028” номини беришга рози бўлди ва 2028-йилда Ўзбекистонда бўлиб ўтадиган Халқаро Астронавтика Конгрессини қўллаб-қувватлашини билдирди. Ҳамкорлик миллий пахта ва буғдой хариталарини яратишда гиперспектрал маълумотлардан фойдаланишни ҳам қамраб олиши маълум қилинган.
