Ўзбекистон Республикаси Президенти Шавкат Мирзиёев ва Россия Федерацияси Президенти Владимир Путин Ўзбекистонда интеграциялашган атом электр станциясининг биринчи энергия блокини қуриш ишларига старт берди. Бу ҳақда Президент матбуот хизмати хабар берди.
Маросимда телекўприк орқали Халқаро атом энергияси агентлиги бош директори Рафаэль Гросси ҳам иштирок этган.
Давлат раҳбари Владимир Путин ва Рафаэль Гроссига ушбу лойиҳанинг рўёбга чиқарилишини шахсан қўллаб-қувватлаганлари ҳамда кўрсатилган эътибор учун миннатдорлик билдирган. Шунингдек, Ўзбекистонда биринчи атом электр станциясини барпо этишда иштирок этаётган Ўзбекистон ва Россия мутахассисларига биргаликдаги саъй-ҳаракатлари ва юксак профессионаллиги учун алоҳида ташаккур айтилган.
Қайд этилишича, мазкур лойиҳанинг амалга оширилиши Ўзбекистоннинг технологик, индустриал ва илмий тараққиётида янги босқични бошлаб бериб, мамлакатда янги тармоқ — атом энергетикасини ривожлантириш учун мустаҳкам асос яратади. Лойиҳа кичик модулли атом генерацияси ҳамда йирик ҳажмли энергетика соҳасидаги энг сўнгги ютуқларни ўзида мужассам этган.
Ўзбекистон етакчиси хавфсизлик ушбу лойиҳанинг мутлақ ва сўзсиз шарти эканини алоҳида таъкидлаган. Станцияни қуриш ва уни эксплуатацияга тайёрлаш ишлари энг замонавий халқаро стандартлар, илғор муҳандислик ечимлари асосида ҳамда Халқаро атом энергияси агентлигининг доимий назорати остида амалга оширилмоқда.
Шунингдек, ушбу йирик лойиҳанинг муваффақиятли амалга оширилиши ва унинг натижалари Ўзбекистон–Россия кенг қамровли стратегик шериклик ва иттифоқчилик муносабатларини янада мустаҳкамлашга хизмат қилишига ишонч билдирилган.
