Украина Президенти Владимир Зеленскийнинг офиси раҳбарлигидан бўшатилган Андрей Ермак ўз хоҳиши билан фронтга жўнамоқчи. Бу ҳақда Ермакнинг ўзи “New York Post” нашрига йўллаган мактубида ёзган.
Газета Ермакнинг ишдан бўшатилгани ҳақидаги хабардан бир неча соат ўтиб келган хатини эълон қилган.
“Мен фронтга кетяпман ва ҳар қандай қийноқларга тайёрман. Мени ҳақорат қилишди ва менинг қадр-қимматим ҳимоя қилинмади. Мен Зеленскийга муаммо туғдирмоқчи эмасман, мен фронтга кетяпман”, дея ёзган Ермак.
Қайд этилишича, Ермак қачон ва қандай тарзда фронтга жўнаши ҳақида аниқ маълумот бермаган. Шунингдек, у ўзига нисбатан “тўқилаётган бўҳтон ва фитналардан” норозилигини, “ҳақиқатни биладиган” одамлардан етарли даражада қўллаб-қувватлаш бўлмаётганини билдирган.
Газетанинг қўшимча қилишича, Ермак бундан буён ҳеч қандай қўнғироқларга жавоб бермаслигини айтган.
Кеча, 28 ноябрь куни Зеленский ўз офиси раҳбари Андрей Ермак истеъфо хатини ёзганини маълум қилган эди. Унгача Олий Рада депутати Ярослав Железняк Украина Миллий коррупцияга қарши бюроси ва Махсус коррупцияга қарши прокуратура энергетика соҳасида юзага келган коррупция можароси фонида Ермакнинг уйида тинтувлар ўтказаётганини билдирган. Бюро тинтувлар ўтказилганини тасдиқлаб, бу тергов доирасидаги процессуал ҳаракатлар эканини айтган.
Кейинчалик “Ukinform” нашри Миллий коррупцияга қарши бюросига таяниб, Ермакнинг уйида ўтказилган тинтувлардан сўнг ҳеч кимга айблов эълон қилинмагани ҳақида ёзган.
