Бирлашган Араб Амирликларининг Дубай шаҳрида бокс бўйича эркаклар ўртасида Жаҳон чемпионати бўлиб ўтмоқда. Халқаро бокс ассоциацияси — IBA томонидан ўтказилаётган ушбу нуфузли мусобақада кеча, 4 декабрь куни Ўзбекистон терма жамоаси аъзолари ўз юришини ғалаба билан бошлади.
Ўзбекистонлик чарм қўлқоп усталари иштирокини –80 кг вазн тоифасида Жавоҳир Умматалиев бошлаб берди. У Сейшел Ороллари вакили Дашеил Фанчеттега қарши рингга кўтарилди. Жанг тўлиқ уч раунд давом этди ва Умматалиев рақиби устидан ҳакамлар қарорига кўра 5:0 ҳисобида ғалаба қозонди.
Жавоҳир Умматалиев — World Boxing ташкилоти томонидан ўтказилган Жаҳон чемпионатининг амалдаги ғолиби ҳисобланади. У IBA’нинг катталар рейтингида ҳали юқори ўринларни эгалламаганлиги боис саралашнинг илк босқичидан ўз иштирокини бошлади. Кейинги босқичда Умматалиев 4-рақам остида сараланган гаитилик Седрик Белони-Дулиэпрега қарши рингга чиқади.
Шунингдек, –63,5 кг вазн тоифасида ҳаракат қилаётган Саят Илёсов ҳам Жаҳон чемпионатини ғалаба билан бошлади. У илк босқичда фаластинлик Анас Сулаймонга қарши баҳс олиб борди ва муддатидан аввал ғалабага эришди. Жанг давомида Илёсов рақибини нокдаун ҳолатига туширишга муваффақ бўлди. Иккинчи раунддан сўнг фаластинлик боксчи жангни давом эттира олмаслиги маълум бўлди ва ўзбекистонлик боксчи ғалабани расмийлаштирди.
Илёсовнинг кейинги босқичдаги рақиби Қирғиз Республикаси вакили Умар Ливаза бўлади.
