Ғазо секторининг жанубидаги Хон Юнус шаҳрида жорий йилнинг 2 декабрь куни БААнинг 54 йиллик иттифоқ куни муносабати билан Абу-Даби томонидан қўллаб-қувватланган байрамда 54 жуфтлик учун оммавий тўй бўлиб ўтди. Бу ҳақда “Анадолу” хабар берди.
Ҳамад тураржой мажмуасининг вайроналари остида ўтказилган маросим БААнинг “Жасоратли рицарь 3” гуманитар операцияси доирасида ташкил этилган.
“Тавб ал-Фараҳ” (Хурсандчилик либоси) деб номланган тўй саҳнаси Исроил геноцидидан вайрон бўлишига қарамай, чидамлилик ва ҳаётга интилиш рамзи сифатида танланган.
Маросимда ҳамма жой Фаластин байроқлари ва гуллар билан безатилди, анъанавий қўшиқлар янгради, тўйни кўришга кўплаб ғазоликлар йиғилди. Ташкилотчиларнинг сўзларига кўра, жуфтликлар лотерея орқали танлаб олинган, унга анклав бўйлаб тахминан 2651 аризачи киритилган.
“Биз ҳам бутун дунё каби бахтли бўлишни хоҳлаймиз, мен ҳам уйим, ишим, ҳамма каби бўлишни орзу қилардим. Бугун менинг орзуйим – яшаш учун чодир бўлса ҳам топиш. Ҳаёт қайтиб кела бошлади, лекин бу биз кутганимиздек эмас”, дейди уйланаётганлардан бири.
“Жасоратли рицарь 3” кампанияси 2023 йилнинг 5 ноябрида БАА Президенти Муҳаммад бин Зайд Ол Наҳаён бошчилигида Ғазонинг энг оғир жабр кўрган ҳудудларига озиқ-овқат ва тиббий ёрдам етказиб бериш учун бошланган.
