Ўзбекистон, Қозоғистон ва Қирғизистон сув-энергетика соҳасидаги ҳамкорлик параметрлари ва ўзаро қўллаб-қувватлаш бўйича келишувга эришди. Бу ҳақда Энергетика вазирлиги матбуот хизмати хабар берди.
Маълум қилинишича, 22 ноябрь куни Олмаота шаҳрида Ўзбекистон, Қозоғистон ва Қирғизистон энергетика ҳамда сув хўжалиги вазирларининг йиғилиши бўлиб ўтди. Музокараларда Ўзбекистон энергетика вазири Жўрабек Мирзамаҳмудов, сув хўжалиги вазири Шавкат Ҳамроев, Қозоғистон энергетика вазири Ерлан Аккенженов, сув ресурслари ва ирригация вазири Нуржан Нуржигитов, Қирғизистон энергетика вазири Таалайбек Ибраев ва сув ресурслари, қишлоқ хўжалиги ва қайта ишлаш саноати вазири ўринбосари Алмаз Жееналиев иштирок этди.
Томонлар сув-энергетика соҳасидаги ҳамкорликни янада ривожлантириш параметрлари тўғрисида келишиб олди. Тўхтағул сув омборидаги мураккаб вазиятни ҳисобга олган ҳолда, учрашув иштирокчилари ўзаро электр энергияси етказиб бериш орқали бир-бирларини қўллаб-қувватлаш, иситиш мавсумини муваффақиятли ўтказиш ва келгуси вегетация мавсумига тайёргарлик кўриш учун биргаликдаги саъй-ҳаракатларни мувофиқлаштиришга қарор қилишди.
Қозоғистон ва Ўзбекистон куз-қиш мавсумида Қирғизистонга электр энергияси етказиб беришга тайёрлигини тасдиқлади. Бу Қирғизистон томонига қишда электр энергияси ишлаб чиқариш ҳажмини камайтириш ва Тўхтағул сув омборида сув тўплаш имконини беради. Жамғарилган ҳажм вегетация даврида жанубий ҳудудларнинг қишлоқ хўжалиги ерларини барқарор суғоришни таъминлаш учун Қозоғистон ва Ўзбекистонга йўналтирилади.
Бундан ташқари, минтақада истеъмолни камайтириш ва энергияни тежаш бўйича қўшма чора-тадбирлар кўриш тўғрисида келишувга эришилди.
Музокаралар иштирокчилари ҳамкорликдаги ишлар яхши қўшничилик руҳида олиб борилаётгани ва бутун Марказий Осиёда энергетика хавфсизлиги ва барқарорлигини мустаҳкамлашга қаратилганини таъкидлади. Шунингдек, Ўзбекистон томони транзит, етказиб бериш ва энергия тизимини мувозанатлаш учун техник шартларни таъминлашга тайёрлигини тасдиқлади.
Йиғилиш якунида 2026 йил вегетация даври учун қишки электр энергияси етказиб бериш ва сув тўплаш ҳажмларини ҳуқуқий жиҳатдан мустаҳкамловчи уч томонлама баённома имзоланди.
14 ноябрда Марказий Осиё давлатлари Чордара сув омборига вегетациялараро даврда келиши кутилаётган сув миқдори бўйича келишувга эришганди. Учрашувда иштирокчилар Оролни қутқариш халқаро жамғармаси асосчиси давлатлар раҳбарларининг саммитларида белгиланган вазифаларни амалга ошириш масалаларини ҳам муҳокама қилишган.
