Ўзбекистон ва Россия нефть-газ етказиб бериш ҳажмини ошириш бўйича келишувга эришди. Бу ҳақда бугун, 13 апрель куни Россия Бош вазири Михаил Мишустин Россия ва Ўзбекистон ҳукумат раҳбарлари даражасидаги Қўшма комиссия йиғилишида маълум қилди.
“Россия Ўзбекистоннинг ташқи савдо ҳажми бўйича етакчилар қаторига киради. Ўтган йили ўзаро товар айланмаси қарийб 12,5 фоизга ўсди ва ҳозирда тахминан бир триллион рублга яқинлашди. Давлат раҳбарларининг келишувларига мувофиқ, биз 2030 йилгача ушбу кўрсаткични бир неча баробар оширишимиз керак. Бундай режаларни амалга ошириш учун зарур база мавжуд деб ҳисоблайман”, дейди Мишустин.
Ўз навбатида, Ўзбекистон Бош вазири Абдулла Арипов йиғилиш аввалида Ўзбекистон-Россия ўртасидаги ҳар томонлама стратегик шериклик ва ҳамкорлик муносабатлари ҳозирги вақтда принципиал жиҳатдан янги босқичга чиққанини таъкидлаган.
“Сўнгги 5 йил ичида икки томонлама товар айланмаси икки баробарга ўсди ва 2025 йил якунларига кўра, сиз таъкидлаганингиздек, 13 миллиард доллардан ошди. Бизнинг маълумотларимизга кўра, бу ижобий динамика жорий йилда ҳам сақланиб қолмоқда: йилнинг дастлабки 2 ойи давомида савдо ҳажми яна 30 фоизга ўсди”, дейди Арипов.
Унинг қайд этишича, 2030 йилгача қўшма товар айланмасини 30 миллиард долларга етказиш вазифасини бажариш мақсадида Ўзбекистон ва Россия ўзаро маҳсулот етказиб бериш номенклатурасини, энг аввало, юқори қўшилган қийматга эга маҳсулотлар улушини ошириш ҳисобига сезиларли даражада кенгайтирмоқда.
Шунингдек, Мишустин энергетика соҳасини ҳамкорликни кучайтириш учун асосий йўналиш сифатида кўриб чиқилаётганини таъкидлаган. У Россия лойиҳаси асосида Ўзбекистонда интеграциялашган АЭС қурилиши бошланганини эслатиб ўтган.
“Ушбу кенг кўламли ташаббуснинг амалга оширилиши, шубҳасиз, Ўзбекистон иқтисодиёти ва ижтимоий соҳасига қўшимча туртки беради, аҳоли ва бизнесни ўн йиллар давомида тинч атом энергияси билан таъминлашни кафолатлаш имконини тақдим этади”, дейди Мишустин.
Шу билан бирга, у ёқилғи секторидаги ҳамкорлик ҳам фаол ривожланётганини қўшимча қилган.
“Россия нефти ва табиий газини етказиб беришни давом эттириш ва уларнинг ҳажмини ошириш бўйича келишувга эришилди. Россиялик мутахассислар иштирокида Ўзбекистон ҳудудида янги қудуқларни бурғилаш, қайта ишлаш тизими ва газ транспорти инфратузилмасини модернизация қилиш ишлари олиб борилмоқда”, дейди Россия Бош вазири.
Мишустиннинг сўзларига кўра, республикада қиймати 4 триллион рублдан ортиқ бўлган 150 га яқин инвестиция лойиҳаси амалга оширилмоқда.
