Бразилия разведкаси собиқ раҳбари Александр Рамагем АҚШда Иммиграция ва божхона назорати хизмати (ICE) томонидан қўлга олинди. Бу ҳақда Reuters хабар берди.
Рамагем сентябрь ойида Бразилиянинг собиқ президенти Жаир Болсонаро билан давлат тўнтаришини режалаштиришда айбланиб, мамлакатдан қочиб кетганди. У ўз ватанида 2022 йилги сайловларда Болсонаро устидан ғалаба қозонган сўл қанот етакчиси Луиз Инасио Лула да Сильванинг ҳокимиятга келишини бекор қилишга қаратилган фитнада иштирок этганликда айбланиб, 16 йилдан ортиқ қамоқ жазосига ҳукм қилинган.
Рамагем ўзига қўйилган айбловларни рад этмоқда. АҚШ Иммиграция ва божхона хизмати унинг ҳибсга олинганини тасдиқлаган, бироқ тафсилотларни очиқламаган. Бразилия Федерал полицияси 13 апрель кунги баёнотида ҳукумат қидирувида бўлган бразилиялик эркак Флорида штатининг Орландо шаҳрида ICE томонидан қўлга олинганини маълум қилди. Шахсга оид маълумотлар ошкор этилмади, аммо у Бразилия Олий суди томонидан давлат тўнтаришига тайёргарлик кўришда айблангани билдирилди.
Қўлга олиш ҳар икки давлат ҳуқуқни муҳофаза қилиш органлари ўртасидаги ҳамкорлик натижаси бўлди, дея қўшимча қилди Бразилия федерал полицияси.
Болсонаронинг АҚШда яшовчи иттифоқчиси Пауло Фигейредо эса 13 апрель куни Рамагем йўл ҳаракати қоидаларини бузгани учун Орландода ушланиб, кейинчалик қўйиб юборилганини айтди.
Болсонаро иши: Трамп норозилиги судга таъсир қилмади
Бразилия собиқ президенти Жаир Болсонарога қарши иш АҚШ президенти Дональд Трампнинг кескин норозилигига сабаб бўлган эди. У 2025 йилда Бразилиядан импорт қилинадиган маҳсулотларга юқори божлар жорий этилишини айнан шу ҳолат билан изоҳлаган. Бироқ бу босим тергов ва суд жараёнларига таъсир кўрсатмади. 2025 йил сентябрида якунланган судда 29 киши, жумладан, ҳозирда 27 йиллик қамоқ жазосини ўтаётган Болсонаро ҳам айбдор деб топилган. Кейинчалик Трамп жорий этган божларнинг бир қисмини бекор қилган.
Болсонаро маъмурияти даврида Рамагем разведка хизматига раҳбарлик қилган. У 2019 йилдан бошлаб собиқ президент танқидчиларига қарши терговлар ўтказиш ва Бразилия сайлов тизимини обрўсизлантиришга хизмат қилган маълумотларни тақдим этишда айбланмоқда.
