Америка Қўшма Штатлари Миллий терроризмга қарши кураш маркази директори Жозеф Кент истеъфога чиқишини эълон қилди ва бу қарорини маъмуриятнинг Эронга нисбатан сиёсатидан рози эмаслиги билан изоҳлади. У тегишли мактубни Президент Дональд Трампга йўллаган, нусхасини эса ўзининг X саҳифасида эълон қилди.
“Узоқ ўйлаб кўргандан сўнг, бугундан бошлаб Миллий терроризмга қарши кураш маркази директори лавозимидан истеъфога чиқишга қарор қилдим”, деб ёзган Кент.
У жорий можарони қўллаб-қувватлай олмаслигини таъкидлаган.
“Мен виждоним тоза ҳолда Эронда давом этаётган урушни қўллаб-қувватлай олмайман”, дейди Кент.
Унинг сўзларига кўра, Эрон Америка Қўшма Штатлари учун “бевосита таҳдид солмаган”, можаро эса, унинг таъкидлашича, “Исроил ва унинг таъсиридаги Америка лоббиси босими остида” бошланган. Кент шунингдек, ҳозирги маъмурият иш бошлаганида “дезинформация кампанияси” йўлга қўйилганини, у мамлакат раҳбариятини ҳарбий ҳаракатлар зарурлигига ишонтирганини айтган.
“Мен сиз 2016, 2020 ва 2024 йиллардаги сайловларда илгари сурган ва биринчи муддатингизда амалга оширган қадриятлар ҳамда ташқи сиёсатни қўллаб-қувватлайман. 2025 йил июнигача сиз Яқин Шарқдаги урушлар – бу тузоқ эканини тушунар эдингиз, улар Америкадан қимматли инсонлар ҳаётини олиб кетди ва миллатимизнинг бойлиги ҳамда фаровонлигига путур етказди. Биринчи президентлик муддатингиз давомида сиз ҳарбий кучни қандай қатъият билан қўллашни, бироқ чексиз урушларга тортилиб кетмасликни бошқа ҳар қандай замонавий Президентдан кўра яхшироқ тушунган эдингиз. Буни Қосим Сулаймонийни йўқ қилиш ва ИШИДни тор-мор этиш орқали намойиш этдингиз. Ҳозирги маъмурият бошида юқори лавозимли исроиллик амалдорлар ва Америка оммавий ахборот воситаларининг таъсирли вакиллари дезинформация кампаниясини бошлаб, сизнинг “Америка биринчи ўринда” платформангизни издан чиқарди ва Эрон билан урушга туртки бериш учун ҳарбий кайфиятни шакллантирди. Бу ахборот “эхо-камераси” сизга Эрон Америка Қўшма Штатлари учун бевосита таҳдид эканини ва ҳозир зарба берилса, тезда ғалабага эришиш мумкинлигини ишонтириш учун ишлатилди. Бу ёлғон эди ва бу худди исроилликлар бизни минглаб энг яхши ўғил-қизларимизнинг ҳаётига зомин бўлган Ироқдаги фалокатли урушга тортишда қўллаган тактиканинг ўзи. Биз бу хатони яна такрорламаслигимиз керак”, дейди Кент.
Унинг мактубида айтилишича, Кент жангларда қатнашган ветеран сифатида можарони янада кучайтиришни қўллаб-қувватлай олмайди.
“Мен Америка халқига фойда келтирмайдиган урушга кейинги авлодни юборишни қўллаб-қувватлай олмайман”, дейди у.
Якунда Кент Президентни сиёсатни қайта кўриб чиқишга чақирган.
“Сиз йўналишни ўзгартириб, мамлакатимиз учун янги йўл белгилашингиз мумкин ёки бизни янада таназзул ва бетартибликка ботишга қўйиб беришингиз мумкин. Барча имкониятлар сизнинг қўлингизда”, дейди собиқ мулозим.
Кент, шунингдек, маъмурият ва мамлакатга хизмат қилиш ўзи учун шараф бўлганини айтиб, истеъфоси дарҳол кучга киришини тасдиқлаган.
Бунгача Америка Қўшма Штатлари Чегара хизмати сектори бошлиғи Грегори Бовино ҳам истеъфога чиқиши маълум қилинган. У Дональд Трамп маъмуриятининг миграцияга қарши сиёсатидаги асосий шахслардан бири ҳисобланади.
