АҚШ Президенти Дональд Трамп Эронга зарба бермаслик ҳақидаги қарорни мустақил равишда қабул қилганини айтди. Бу ҳақда у кеча, 16 январь куни журналистлар билан суҳбатда гапирди.
Унинг сўзларига кўра, бу борада уни ҳеч ким кўндирмаган.
“Мени ҳеч ким ишонтиргани йўқ. Мен ўзимни ўзим ишонтирдим”, дейди у журналистларга.
Трамп бу қарорга Теҳрон томонидан намойишчиларга нисбатан ўлим жазоларининг бекор қилингани “катта таъсир кўрсатганини” маълум қилган.
“Улар осиб ўлдириш орқали амалга оширилиши белгиланган 800 дан ортиқ қатлни режалаштирган эди. Ҳеч кимни қатл этишмади. Улар жазоларни бекор қилишди”, дейди Трамп.
Бироқ “Reuters”нинг ёзишича, Эрон расмийлари бу маълумотни тасдиқламаган.
Бунгача эса Трамп АҚШ ҳарбий ҳаракатлар бўйича қарор қабул қилишдан олдин Эронни кузатишда давом этишини билдирган. Саудия Арабистони, Қатар ва Уммон эса минтақада беқарорлик юзага келишидан хавотир олиб, АҚШ Президентини Эронга ҳужум қилмасликка кўндиришга муваффақ бўлгани.
Манбаларга кўра, тинчликка ҳақидаги баёнотларга қарамасдан, АҚШ маъмурияти ҳарбий тайёргарликни давом эттирмоқда. Хусусан, “Fox News” телеканали манбаларига кўра, Қўшма Штатлар қўшимча ҳарбий имкониятлар яратиш мақсадида камида битта авиация ташувчи кемани Яқин Шарқ томон йўналтирмоқда. Шунингдек, минтақада қуруқлик ва ҳаво кучларини, шунингдек, ракетага қарши мудофаа тизимларини кучайтириш режалари мавжуд. Суҳбатдошлардан бири зарба берилган тақдирда операция “аввалгидан ҳам кескинроқ ва агрессивроқ бўлиши”ни айтган.
“Axios” нашри манбаларига таяниб ёзишича, Трамп зарба бериш бўйича қарорни кечиктирган, бироқ ҳарбий вариант кун тартибидан олиб ташланмаган. Оқ уйда иттифоқчилар билан маслаҳатлашувлар ўтказилган. Исроил томони чекланган зарбаларнинг самарадорлигига шубҳа билдирган.
