Эрон Ислом инқилоби қўриқчилари корпуси АҚШнинг Қувайт ва Баҳрайндаги ҳарбий базаларига ракета ва дронлар ёрдамида зарба берганини маълум қилди. Бу ҳақда “Tasnim” ахборот агентлиги хабар берди.
Корпус баёнотига кўра, ҳужумлардан бири АҚШ Ҳарбий-денгиз кучлари Бешинчи флоти штабига қаратилган. Зарбалар Қешм оролининг жанубидаги нефть танкерига ва корпуснинг телекоммуникация минорасига уюштирилган ҳужумларга жавоб сифатида амалга оширилгани айтилган.
“Аввал ҳам огоҳлантирган эдик: агар ҳужум такрорланса, жавоб янада оғирроқ бўлади. Айнан шундай қилдик. Бу жавоблар сабоқ бўлиши керак”, дейилади баёнотда.
Шу билан бирга, АҚШ Марказий қўмондонлиги матбуот хизмати Эроннинг барча ҳужумлари муваффақиятсиз якунланганини билдирган.
“АҚШ Қуролли кучлари ҳушёрликни сақлаб қолмоқда ва Эроннинг асоссиз тажовузидан ҳимояланишга тайёр”, дейилади АҚШ баёнотида.
1 июнь куни АҚШ Марказий қўмондонлиги Эроннинг Горук ҳудуди ва Қешм оролида жойлашган радарлар ҳамда дронларни бошқариш пунктларига “ўзини ҳимоя қилиш мақсадида” зарба берганини маълум қилган эди.
Қўмондонликка кўра, АҚШ қирувчи самолётлари минтақавий сувлардаги кемаларга таҳдид солаётган Эрон ҳаво мудофааси воситалари, ерусти бошқарув пункти ва иккита ҳужумкор дронни йўқ қилган.
Қайд этиш жоиз, АҚШ ва Эрон ўртасида апрель ойи бошида эълон қилинган сулҳ режими амалда қолмоқда. Кейинчалик АҚШ Президенти Дональд Трамп уни алоҳида фармойишга қадар номаълум муддатга узайтирган.
Бироқ сулҳга қарамай, май ойи бошида томонлар Ҳормуз бўғозида ўзаро зарбалар алмашган. Ўшанда АҚШ Бандар-Аббос порти ва Қешм оролидаги объектларга ҳужум қилган, Эрон эса USS Truxtun, USS Rafael Peralta ва USS Mason эсминецларига зарба берганини маълум қилган. АҚШ томони кемалар зарар кўрмаганини билдирган.
