Покистонда қамоқда сақланаётган собиқ бош вазир Имрон Хоннинг кўзи жиддий шикастланди ва у камерада даволаниш ҳуқуқидан маҳрум этилган. Бу ҳақда унинг сиёсий партияси вакилларига таяниб, The Guardian хабар берди.
73 ёшли Имрон Хон Покистондаги энг машҳур сиёсий маҳбуслардан бири ҳисобланади. У 2023 йил августидан бери қамоқда сақланмоқда. Собиқ бош вазир коррупция ва давлат сирларини ошкор қилишда айбдор деб топилган. Хон бу айбловларни уни сиёсатдан четлатишга қаратилган кампания деб баҳолайди.
Адвокатларга кўра, Имрон Хон узоқ вақтдан бери якка тартибдаги камерада сақланмоқда ва сўнгги уч ой давомида унга киришга рухсат берилмаган. Унинг Покистон “Таҳрики Инсоф” (PTI) партияси Имрон Хоннинг ўнг кўзига марказий тўр парда венаси окклюзияси ташхиси қўйилганини билдирди.
“Қамоқхонада уни текширган тиббиёт мутахассисларига кўра, бу жуда жиддий ҳолат бўлиб, агар вақтида ва тўғри даволанмаса, кўриш қобилиятига доимий зарар етказиш хавфи юқори”, дейилади PTI баёнотида.
Суд қарорига биноан, Имрон Хонга ҳафтасига икки марта оила аъзолари ва адвокатлари билан учрашишга рухсат берилиши керак. Бироқ у 100 кундан бери адвокатлари билан учрашмаган. Партия раҳбарларининг унга киришга рухсат сўраб берган аризаси эса рад этилди. Қамоқхона маъмурияти бир неча ой давомида Хоннинг шахсий шифокорини уни кўрикдан ўтказишга қўймаган.
“Суд буйруқларига қарамай, биз Хон билан учраша олмадик. У ташқи дунё билан алоқасиз ҳолда, якка камерада сақланмоқда, бу эса унинг асосий ҳуқуқларига зид. Соғлиғи ҳақидаги маълумотлардан сўнг бизга ва унинг шифокорларига уни кўришга зудлик билан рухсат берилиши керак”, деди PTI раҳбари ва адвокат Гоҳар Али Хон.
2025 йил охирида соғлиғи билан боғлиқ хавотирлар ортидан Имрон Хонга декабрь бошида опа-сингиллари билан қисқа учрашувга рухсат берилган эди. Улар ўшанда унинг аҳволи яхши эканини айтган.
“Бироқ ҳозирда Хоннинг кўзи қандай ҳолатда экани номаълум, чунки яқинлари унга кириш имконига эга эмас”, деди унинг синглиси Узма Хонум.
Имрон Хон 2018–2022-йилларда Покистон бош вазири лавозимида ишлаган. У қудратли ҳарбий тузилмалар билан келишмовчиликдан сўнг ишончсизлик вотуми орқали лавозимидан четлатилган. 2023 йил августида эса турли айбловлар билан ҳибсга олинган. Хон бу ишларни ҳарбийлар ва ҳукумат томонидан уни сиёсатдан четлатиш учун уюштирилган деб ҳисоблайди.
Собиқ бош вазир дастлаб “давлат совғаларини сотиш” айби билан уч йилга, 2025 йил январида эса коррупция айбловлари билан яна 14 йилга озодликдан маҳрум этилган. Шу иш доирасида унинг рафиқаси Бушра Биби ҳам етти йилга ҳукм қилиниб, ҳозирда қамоқда қолмоқда.
