Ҳиндистоннинг антитеррор агентлиги – Миллий тергов агентлиги (NIА) шу йил апрель ойида мамлакат назоратидаги Кашмирда содир этилган ва 26 кишининг ўлимига сабаб бўлган ҳужумда Покистоннинг иккита жангари гуруҳи ва олти кишини айблади. Бу ҳақда BBC хабар берди.
Паҳалгам сайёҳлик марказида содир бўлган ушбу воқеа ядро қуролига эга бўлган Ҳиндистон ва Покистонни уруш ёқасига олиб келган эди. Ўшанда Ҳиндистон ҳужумда Покистонни айблаган, Исломобод эса бу айбловни рад этган.
Асосий айбланувчилар ва айбловлар
БМТ томонидан террорчи ташкилот деб эълон қилинган, Покистоннинг “Лашкари Таиба” ва “Қаршилик фронти” гуруҳларига ҳужумни режалаштириш, амалга ошириш ва ёрдам бериш айби қўйилди. “Қаршилик фронти” дастлаб ҳужум учун жавобгарликни ўз зиммасига олган, бироқ кейинчалик буни рад этганди. Покистон ҳукумати ҳозирча айбловларга изоҳ бермаяпти.
Жамму штатидаги махсус судда 15 декабрь тақдим этилган 1597 саҳифалик айблов хулосасида жангари гуруҳлар ва олти нафар шахснинг номи келтирилган. Улардан учтаси ҳужумдан бир неча кун ўтиб хавфсизлик кучлари томонидан ўлдирилган.
NIА томонидан покистонлик террористларни бошқарувчи деб аталган Сажид Жатт исмли шахс, шунингдек, июнь ойидан бери NIА ҳибсида бўлган яна икки нафар киши ҳам айблов хулосасига киритилган.
“Сўроқ пайтида икки шахс ҳужумда иштирок этган қуролли уч нафар террористнинг шахсини ошкор қилди ва уларнинг тақиқланган ‘Лашкари Таиба’ террор ташкилотига алоқадор Покистон фуқаролари экани тасдиқлади”, дейилади NIА баёнотида.
Айбланувчиларга Ҳиндистоннинг жиноий кодекси ва қатъий аксил-террор қонуни бўйича тегишли моддалар билан айблов эълон қилинди. NIА баёнотига кўра, улар Ҳиндистонга қарши уруш олиб боришда ҳам айбланмоқда.
Кашмир можароси ва азалий кескинлик
Кашмир узоқ вақтдан бери Ҳиндистон ва Покистон ўртасида низо нуқтаси бўлиб келмоқда. Икки қўшни давлат бутун минтақага даъво қилади, бироқ ҳар икки мамлакат унинг фақат бир қисмини назорат қилади. Ушбу баҳсли ҳудуд туфайли қўшни давлатлар икки марта тўқнашган. Паҳалгам воқеалари 2019-йилдан бери Ҳиндистон назоратидаги Кашмирда содир бўлган энг қонли жангари ҳужумларидан бири бўлиб тарихга кирди.
Воқеа 22 апрель куни содир бўлиб, жангарилар 25 нафар ҳинд сайёҳларига ҳужум қилиб, уларни ўлдирган. Жабрланганларга ёрдам бермоқчи бўлган маҳаллий от боқувчи ҳам ўлдирилган. Ҳужумдан кейинги кунларда икки давлат ўртасида тўрт кунлик қуролли тўқнашув юз берган.
