Ўзбекистонда фирибгарликда айбланиб, қидирувда бўлган эркак Туркияда ушланди. Бу ҳақда ИИВ Тезкор-қидирув департаменти хабар берди.
Ўзбекистон Ички ишлар вазирлиги Тезкор-қидирув департаменти ҳамда мамлакатнинг Истанбул шаҳридаги Бош консулхонаси билан ҳамкорликда олиб борилган тезкор-қидирув тадбирлари натижасида Жиноят кодексининг 168-моддаси (фирибгарлик) 4-қисмида назарда тутилган жиноятни содир этишда айбланган фуқаро Туркияда қўлга олинган.
1980-йилда туғилган мазкур шахс ўн нафардан ортиқ фуқарога юк ташувчи транспорт воситасини олиб беришни ваъда қилиб, фирибгарлик йўли билан 3 миллиард 607 млн сўмдан ортиқ маблағни қўлга киритган.
2023-йилдан буён Юнусобод тумани ИИО ФМБ томонидан қидирув эълон қилинган фуқаронинг Туркиянинг Истанбул шаҳрида яшириниб юргани аниқланиб, ўтказилган тезкор тадбирлар давомида қўлга олинди ва Ўзбекистонга қайтарилди.
