Тошкент шаҳрида 13 ёшли ўсмирлар автомобиль рулига ўтириб, ички йўлларда катта тезликда ҳаракатлангани ортидан уларнинг отаси 5 суткага қамалди.
Ижтимоий тармоқларда тарқалган видеоларда болалар бир неча марта турли машиналар рулида ўтиргани, йўл ҳаракати қоидаларини қўпол тарзда бузганини кўриш мумкин.
Шундан кейин болалар яшайдиган маҳалла аҳолиси улар яшайдиган уйга шикоят қилиб борган. Аммо ўсмирларнинг отаси фарзандларини тартибга чақириб қўйишни сўраб келган маҳалладошларига ўта қўпол муносабатда бўлган.
Ушбу ҳолат ижтимоий тармоқда кенг тарқалиб, муҳокамаларга сабаб бўлгач, уларнинг отасига нисбатан болаларга тарбия бермаслик ва майда безорилик моддалари билан иш қўзғатилди ва у 5 сутка маъмурий қамоқ жазосига ҳукм қилинди.
Маълум қилинишича, болаларнинг отаси мамлакатдаги йирик тадбиркорлардан бири Нозим Азизов ҳисобланади.
Шунингдек, ўсмирлар ҳайдаган машиналардан бири жарима майдончасига қўйилган.
