АҚШнинг собиқ президенти Барак Обаманинг айтишича, агар ҳукумат ҳақиқатан ҳам ўзга сайёраликлар билан учрашганида, буни узоқ вақт сир сақлаб қололмас эди. Бу ҳақда у CBS телеканалидаги интервьюсида айтиб ўтган.
Обаманинг сўзларига кўра, Вашингтонда сирларни сақлаш жуда ёмон йўлга қўйилган.
Собиқ президентнинг фикрича, айнан шу сабабли агар “АҚШ ҳукумати назоратидаги қандайдир нарса” ҳақиқатан ҳам топилган, кўрилган ёки суратга олинган бўлса, бу маълумот эртами-кечми нафақат ҳукуматга, балки жамоатчиликка ҳам ошкор бўлар эди.
“Қасам ичаман, қайсидир қўриқчи аллақачон бирор ўзга сайёралик билан селфи қилиб, уни севгилисига юборган бўларди”, деган Обама ҳазил аралаш.
Йил бошида Обама подкастлардан бирида ҳам ўзга сайёраликлар мавжуд бўлиши мумкинлигини айтганди.
“Улар мавжуд бўлиши мумкин, лекин мен уларни кўрмаганман. Уларни 51-ҳудудда сақлашмайди”, деган эди у.
51-ҳудуд АҚШ Ҳарбий-ҳаво кучларининг жуда махфий объекти сифатида танилган бўлиб, унинг устидаги ҳаво ҳудуди ёпилган.
Обама шунингдек, агар бу жуда катта фитна бўлмаса ва маълумот президентнинг ўзидан ҳам яширилмаган бўлса, ҳеч қандай ерости махфий базаси йўқлигини таъкидлаган.
Кейинроқ у коинотнинг қаеридадир ҳаёт мавжуд бўлиш эҳтимоли юқори эканини, бироқ ўзга сайёраликлар Ерга келган бўлиш эҳтимоли пастлигини айтган.
